Հռոմի Պապի այցը Ծիծեռնակաբերդ կարող է սրել Վատիկանի և Անկարայի միջև հարաբերությունները. The Wall Street Journal

Հռոմի Պապ Ֆրանցիսկոսն ուրբաթ օրը եռօրյա այց կկատարի Հայաստան, որտեղ կայցելի Հայոց ցեղասպանության զոհերի հուշահամալիր, ինչը հավանաբար ևս մեկ անգամ կսրի Վատիկանի և Անկարայի միջև հարաբերությունները, գրում է The Wall Street Journal-ը:

Այս այցը տեղի է ունենում Կովկասյան անհանգիստ տարածաշրջանում բռնության խոշոր բռնկումից հետո, նշում է պարբերականը՝ նկատի ունենալով ապրիլյան քառօրյա պատերազմը:

Ծիծեռնակաբերդի հուշահամալիր այցի հիմնական հարցն այն է, թե արդյոք Պապը կկրկնի՞ անցած տարի արած բնութագրումը «20-րդ դարի առաջին ցեղասպանության մասին»: Անցած տարի Սուրբ Պետրոսի տաճարում արարողության ժամանակ արված հայտարարությանն ի պատասխան՝ Թուրքիան անմիջապես հետ կանչեց Վատիկանում իր դեսպանին խորհրդակցությունների համար։ Դեսպանի վերադարձը 10 ամիս տևեց: Թուրքիայի նախագահը դատապարտեց Պապի հայտարարությունը և նախազգուշացրեց նրան «չկրկնել սխալը»:

Թերթը հիշեցնում է, որ Սուրբ Հովհաննես Պողոս II-ն օգտագործել է «ցեղասպանություն» բառը 2001 թվականին Հայաստան այցի ժամանակ՝ Գարեգին II կաթողիկոսի հետ համատեղ հայտարարությունում: Բայց Ֆրանցիսկոս պապն է՛լ ավելի հեռուն գնաց՝ ցեղասպանությունն անվանելով 20-րդ դարում «երեք մեծ և աննախադեպ ողբերգություններից մեկը»։

Ֆրանցիսկոս Պապը 1915 թվականի կոտորածները կապել է մեր օրերում դավանանքի կամ ազգային պատկանելության համար իրականացվող զանգվածային հետապնդումների և բռնությունների հետ: Հռոմի պապը բազմիցս բարձրաձայնել է քրիստոնյաների հետապնդումների մասին։ 

Պապի այցելության կոնտեքստում կլինի նաև Հայաստանի և Ադրբեջանի միջև լարվածությունը: Տասնամյակների ընթացքում ամենաուժեղ բախումները տեղի ունեցան, երբ ադրբեջանական ուժերը հարձակվեցին հայկական դիրքերի վրա՝ փորձելով գրավել ռազմավարական բարձունքներ, գրում է թերթը և հիշեցնում, որ երկուշաբթի օրը ՌԴ նախագահ Վլադիմիր Պուտինի միջնորդությամբ Հայաստանի և Ադրբեջանի նախագահները հանդիպեցին Սանկտ Պետերբուրգում:

Հռոմի Պապն Ադրբեջան կայցելի այս աշնանը՝ սեպտեմբերի 30-ից հոկտեմբերի 2-ն ընկած ժամանակահատվածում: Այդ ընթացքում նա կլինի նաև Վրաստանում։ Վատիկանը պաշտոնապես այդ երկու այցելությունները ներկայացնում է որպես Կովկասյան տարածաշրջան 1 ուղևորության 2 մաս:

Թերթը նշում է, որ Պապի այցը հնարավորություն կընձեռի ամրապնդելու Հայ առաքելական եկեղեցու հետ կապերը:

Կիրակի հեռանալուց առաջ Ֆրանցիսկոս պապը կաղոթի Խոր Վիրապ վանքում, որից մինչև Թուրքիայի հետ սահմանը 15 րոպեի ճանապարհ է։ Սահման այցելություն նախատեսված չէ, սակայն Պապը սիրում է զարմացնել մարդկանց, ինչպես տեղի ունեցավ 2014 թվականին, երբ Պապը չնախատեսված կանգ է առել Արևմտյան ափին՝ Իսրայելի բաժանարար պատի մոտ աղոթելու համար: Եթե Պապը այնուամենայնիվ ուղևորվի սահման, դա կհիշեցնի 2016 թվականի փետրվարին Մեքսիկա այցի այն դրվագը, երբ Պապը կանգնել էր ԱՄՆ-ի հետ սահմանին և աղոթել Ռիո Գրանդեն անցնելիս զոհված ներգաղթյալների համար։