Անդրանիկ Աբովյանը մասնակցում է «Աշխարհի երիտասարդ բալետ» 6-րդ միջազգային մրցույթին

Ա. Սպենդիարյանի անվան օպերայի և բալետի ազգային ակադեմիական թատրոնի բալետի պարող Անդրանիկ Աբովյանը մասնակցում է հունիսի 19-26-ը Սոչիում անցկացվող «Աշխարհի երիտասարդ բալետ» 6-րդ միջազգային մրցույթին՝ նվիրված կոմպոզիտոր Սերգեյ Պրոկոֆևի ծննդյան 125-ամյակին։ Նա մրցույթին մասնակցում է ՀՀ մշակույթի նախարարության աջակցությամբ։

Ինչպես տեղեկացրին ՀՀ մշակույթի նախարարության հասարակայնության հետ կապերի բաժնից, մրցույթի կարգի համաձայն՝ մասնակիցները ներկայացնելու են կոմպոզիտորի բալետային երաժշտության հիման վրա բեմադրված մեկական կատարում:

Մրցույթին մասնակցում է Հայաստանից, Ռուսաստանից, ԱՄՆ-ից, Ղրղզստանից, Ճապոնիայից, Ուկրաինայից և այլ երկրներից բալետի 47 արտիստ՝ 19–26 տարեկան:

2006 թվականից անցկացվող «Աշխարհի երիտասարդ բալետ» միջազգային մրցույթի նպատակը բալետի երիտասարդ արտիստների համար մասնագիտական զարգացման հարթակի ստեղծումն է: