CityMobil-ը ևս կմտնի հայաստանյան շուկա

Այսօրվանից Երևանի փողոցներում կարող եք հանդիպել Yandex Taxi-ների, որոնք  աշխատում են հատուկ հավելվածի միջոցով:

Պատվիրատուն կարող է իր սմաթֆոնից պատվիրել Yandex Taxi և հետևել մեքենայի ընթացքին:

Նշենք, որ նմանատիպ ծառայություն Հայաստանում արդեն մատուցող ընկերություն կար` GG-ն, որը շուկայում արդեն մեծ տեղ է գրավել:

Yandex Taxi-ի մուտքը միանշանակ չի ընդունվել տաքսիսիտների և ոլորտի ՀԿ-ների կողմից: Կային պնդումներ, որ այս ընկերությունը դաշտը կմոնոպոլիզացնի և արդյունքում կտուժեն անհատ տաքսի ծառայություններ մատուցողները:

ԼՈւՐԵՐ.com-ի տեղեկություններով` հայաստանյան շուկա է փորձում մտնել նաև CityMobil ընկերությունը, որը համարվում է Մոսկվայի առաջատար տաքսի ընկերություններից մեկը:

Մենք տեղեկացանք, որ հանդիպել են CityMobil-ի և GG ընկերության հիմնադիրները և քննարկել են հնարավոր համագործակցության եզրեր:

Նկատելի է, որ ոլորտը կամաց-կամաց հայտնվում է խոշոր բիզնեսի ուշադրության կենտրոնում, ինչպես դա եղավ տարիներ առաջ, երբ Viva Cell-ն ու Orange-ը մտան դաշտ և ակնհայտ մրցակցություն սկսվեց՝ արդյունքում գնային ճկուն համակարգ ձևավորվեց:

Բայց պակաս ցավալի չէ նաև այն հանգամանքը, որ տաքսի ընկերությունների կողմից այս մրցակցության պայմաններում կարծես մի կողմ է քաշվել քաղաքային տրանսպորտը, և տաքսիները եկել են փոխարինելու ավտոբուսներին ու երթուղայիններին: Իրականում խնդիրն ավելի լուրջ է, քանի որ այս տեմպերով շարունակվելու դեպքում տաքսին կդառնա հիմնական ուղևորափոխադրամիջոցը: