Ադրբեջանը թրաֆիքինգի վայր է, աղբյուր և տրանզիտային երկիր. ԱՄՆ Պետդեպ

ԱՄՆ Պետքարտուղարությունը հրապարակել է 2015 թվականին աշխարհում մարդկանց առևտրի իրավիճակի մասին զեկույցը` Ադրբեջանին ներառելով «երկրորդ կարգի» երկրների շարքում: Մասնավորապես, Ադրբեջանը բնութագրվում է որպես մարդկանց առևտրի համար նախատեսված վայր, փոխանցող և աղբյուր երկիր: Այս մասին հայտնում է contact.az-ը:

Այս երկրում տղամարդիկ, կանայք ու երեխաները ենթարկվում են աշխատանքային և սեռական թրաֆիքինգի: Ադրբեջանցի տղամարդկանց և տղաներին հարկադիր աշխատանքի են ենթարկում Թուրքիայում, ՌԴ-ում, ԱՄԷ-ում և հենց Ադրբեջանում։ Իսկ կանայք ու աղջիկ երեխաները սեռական թրաֆիքինգի են ենթարկվում Թուրքիայում, Ռուսաստանում և ԱՄԷ-ում, ասվում է զեկույցում:

Ադրբեջանը նաև հանդիսանում է հարկադիր աշխատանքի և սեռական շահագործման համար երկիր՝ այն մարդկանց համար, ովքեր ժամանում են Ուզբեկստանից, Թուրքմենստանից և Ուկրաինայից: Ադրբեջանում հարկադիր աշխատանքի են ենթարկվում Թուրքիայի, Եվրոպայի, Հարավային և Կենտրոնական Ասիայի ներգաղթյալները:

Ինչպես նախկինում, հիմա ևս, Ադրբեջանը հանդիսանում է տրանզիտային երկիր՝ մարդկանց Կենտրոնական Ասիա, Թուրքիա, Իրան տեղափոխելու համար: Երկրի ներսում որոշ երեխաներ, հիմնականում գնչու երեխաները, հարկադրված են մուրացկանություն անել և զբաղվել փողոցային առևտրով: Ֆիլիպինուհիները երկրում օգտագործվում են որպես աղախիններ:

Նշվում է, որ Ադրբեջանը չի համապատասխանում նվազագույն չափանիշներին մարդկանց առևտրին հակազդելու ոլորտում, սակայն իբրև միջոցներ է ձեռնարկում այդ ուղղությամբ: Սակայն արդեն 3 տարի է, ինչ կառավարությունը ոչ մի օժանդակություն չի ցուցաբերում, որպեսզի որոշ չափով բարելավվի մարդկանց վիճակը: