Ով է ամենաճանաչված քաղաքական գործիչն՝ ըստ երևանցիների. ՄՀԱ

«Մարքեթինգի հայկական ակումբի» հետազոտկան կենտրոնը «Լուսավոր Հայաստան» կուսակցության նախագահ Էդմոն Մարուքյանի, «Քաղաքացիական պայմանագիր» կուսակցության անդամ Նիկոլ Փաշինյանի և «Ալյանս» կուսակցության նախագահ Տիգրան Ուրիխանյանի վերաբերյալ մայիսի 23-ից հունիսի 15-ը Երևանում հետազոտություններ է իրականացրել, որի նպատակը հետևյալն է՝  պարզել ընտրված երեք քաղաքական գործիչների ճանաչելիության մակարդակը Երևանում, պարզել ընտրված երեք քաղաքական գործիչների ճանաչելիության մակարդակը Երևանում՝ ըստ կուսակցական պատկանելության, պարզել, թե վերոնշյալ քաղաքական գործիչներին որքանով են երևանցիները ճանաչում՝ ըստ նրանց գործունեության, պարզել, թե վերոնշյալ քաղաքական գործիչներին տեղեկատվության ո՞ր աղբյուրներից են ճանաչում երևանցիները։ Հետազոտությանը մասնակցել են 18 և բարձր տարիքի 500 մարդ։ 

Եվ այսպես, ԼՈՒՐԵՐ.com-ը ներկայացնում է հետազոտության արդյունքները, որոնք «Էրեբունի պլազա»-ում ներկայացվեց. 

Որքանով են հարցվողները ճանաչել ընտրված երեք քաղաքական գործիչներին.

Հարցվողների 34 տոկոսը ճանաչել է միայն Նիկոլ Փաշինյանին, 28 տոկոսը՝ բոլորին, 23 տոկոսը՝ Նիկոլ Փաշինյանին և Տիգրան Ուրիխանյանին, 12 տոկոսը ոչ ոքի չի ճանաչել, 1 տոկոսը Էդմոն Մարուքյանին և Տիգրան Ուրիխանյանին։ 

Ճանաչելիության բաշխվածությունն ըստ սեռի և տարիքային խմբի

Արական սեռի հարցվողների 88 տոկոսը ճանաչել է Նիկոլ Փաշինյանին, 55 տոկոսը՝ Տիգրան Ուրիխանյանին, 34 տոկոսը՝ Էդմոն Մարուքյանին, 11 տոկոսը ոչ ոքի չի ճանաչել։ Հարցվողների իգական սեռի 85 տոկոսը ճանաչել է Փաշինյանին, 49 տոկոսը՝ Ուրիխանյանին, 24 տոկոսը՝ Մարուքյանին, 13 տոկոսը՝ որ ոքի չի ճանաչել։ 

Ըստ Սեռի հարցվողների քանակ

Արական 277
Իգական 223

Ըստ տարիքի հարցումների արդյունքներով ևս առաջատարը Նիկոլ Փաշինյանն է, այնուհետև Տիգրան Ուրիխանյանը, հետո՝ Էդմոն Մարուքյանը։

Ճանաչելիության մակարդակն ըստ կուսակցական պատկանելիության

Ըստ կուսակցական պատկանելիության Էդմոն Մարուքյանին հիմնականում չեն ճանաչել։ Հարցվածների 59 տոկոսը նշել է, թե չգիտի որ կուսակցությունից է Մարուքյանը։ 12 տոկոսը նշել է «Լուսավոր Հայաստան», 9 տոկոսը՝ անկուսակցական, 7 տոկոսը՝ ՀՀԿ, 4 տոկոսը՝ ԲՀԿ, 3 տոկսը՝ Ժառանգություն, 2 տոկոսը՝ ՀՅԴ, 1,4 տոկոսը՝ ՀԱԿ, 1,4 տոկոսը՝ «Ալյանս», 0,7 տոկոսը՝ «Նոր Հայաստան» և «Քաղաքացիական պայմանագիր»։

Ըստ կուսակցության, հարցվածների 31 տոկոսը Նիկոլ Փաշինյանին ճանաչում է որպես ՀԱԿ կուսակցության անդամ, 53 տոկոսը՝ չգիտի։ Հարցվածների միայն 6 տոկոսն է նշել, որ Փաշինյանին ճանաչում է որպես «Քաղաքացիական պայմանագիր» կուսակցության անդամ։ 

Իսկ ահա Տիգրան Ուրիխանյանին հարցվածների 18 տոկոսը ճանաչել է որպես նախկին ԲՀԿ-ական, 57 տոկոսը նշել է, թե չգիտի, միայն 12 տոկոսն է Ուրիխանյանին ճանաչել որպես «Ալյանս» կուսակցության նախագահ։ 

Ճանաչելիության մակարդակն ըստ տեղեկատվության աղբյուրի

Հարցվածների 65 տոկոսը Էդմոն Մարուքյանին ճանաչել է հեռուստատեսությունից, 12 տոկոսը՝ համացանցից, 11 տոկոսը՝ թերթերից, 7 տոկոսը՝ ռադիոյից, 1 տոկոսը՝ հանրահավաքներից, 0,5 տոկոսն էլ անձնական շփումից։

Նիկոլ Փաշինյանին ևս հիմնականում ճանաչել են հեռուստատեսությունից՝ հարցվածների 68 տոկոս, 12 տոկոսը՝ համացանցից, 8 տոկոսը՝ թերթերից, 6 տոկոսը՝ ռադիոյից, 1,6 տոկոսը՝ հանրահավաքներից, 0,2 տոկոսը՝ ծանոթներից։ 

Նույնն է պատկերը նաև Տիգրան Ուրիխանյանի մոտ։ Հարցվածների 66 տոկոսը նրան ճանաչել է հեռուստատեսությունից, 15 տոկոսը՝ համացանցից, 9 տոկոսը՝ թերթերից, 5 տոկոսը՝ ռադիոյից, 0,9 տոկոսը՝ հանրահավաքներից։ 

Քրիստինա Աղալարյան