Արևից չպաշտպանվելը հետագայում կարող է հանգեցնել մաշկային լուրջ խնդիրների. մաշկաբան

Մաշկաբանը խորհուրդ է տալիս արևապաշտպան քսուքներ օգտագործել ոչ միայն հանգստի մեկնելիս, այլ ցանկացած պահի արևի տակ գտնվելու դեպքում: «Որքան էլ իրազեկված լինենք արեւի վտանգավոր ազդեցության մասին, միևնույն է, արևապաշտպան քսուքը Հայաստանում ավելի շատ ասոցացվում է միայն առողջ և հավասար արևայրուքի հետ: Մենք սովորություն չունենք արևից պաշտպանվելու: Միայն այն ժամանակ ենք պաշտպանվում, երբ մեկնում ենք հանգստի, սակայն այդպես չպետք է լինի: Մաշկը պետք է խնամել անընդմեջ, ամեն եղանակին՝ թե ձմռանը, թե ամռանը: Արևի ազդեցության տակ հատկապես դրա պահանջը ավելի է մեծանում»,- «Արմենպրես»-ի հետ զրույցում նշեց մաշկաբան Հովհաննես Հովհաննիսյանը:

Մասնագետի խոսքով՝ արևից պաշտպանվելու ամենապարզ միջոցը հենց արևային քսուք օգտագործելն է, ինչի պակաս հայաստանյան շուկայում չկա:

«Այնուամենայնիվ, խորհուրդ է տրվում քսուք ընտրելիս անպայման խորհրդակցել բժշկի հետ, քանի որ քսուքների ազդեցության որակը, տեսակները տարբեր են լինում: Առհասարակ, քսուքներ պետք է օգտագործեն այն մարդիկ, ովքեր օրվա ընթացքում բավականին հաճախ և երկար ժամանակով են լինում արևի տակ»,-նշեց Հովհաննես Հովհաննիսյանը:

Մաշկաբանը զգուշացնում է, որ արևից չպաշտպանվելը հետագայում հնարավոր է՝ հանգեցնի մաշկային լուրջ խնդիրների:

«Խրոնիկ մաշկային խնդիրներ ունեցող մարդկանց մոտ ցանկացած մաշկային գրգռում կարող է բերել հիվանդության սրացման: Այրվածքը մաշկի բորբոքում է համարվում, որը առողջ մարդկանց մոտ էլ բազմաթիվ մաշկային խնդիրների պատճառ կարող է հանդիսանալ, ինչպես նաև նպաստել նախաքաղցկեղային վիճակի առաջացնմանը: Արևից, իհարկե, վախենալ կամ խուսափել պետք չէ, սակայն արևից օգտվելու կանոններին պետք է շատ լավ տիրապետել, որովհետև առաջին հայացքից անվտանգ է թվում, սակայն կարող է ունենալ լուրջ հետևանքներ»,-ընդգծեց Հովհաննես Հովհաննիսյանը:

«Արմենպրես»-ի այն հարցին, թե արդյոք այս ժամանակահատվածում արևի ճառագայթների ազդեցությունից առաջացած մաշկային խնդիրներով հաճախ են դիմում մաշկաբաններին, նա պատասխանեց.

«Դեռ չեն սկսել դիմել, սակայն օգոստոսի կեսերին մենք պատրաստ սպասում ենք, քանի որ հատկապես այդ ժամանակահատվածում են ավելի հաճախ դիմում: Գալիս են եւ՛ արտերկրում հանգիստն անցկացրած մարդիկ, եւ՛ մեզ մոտ՝ օրինակ՝ Սևանում: Այնուամենայնիվ, կարող եմ փաստել, որ գնալով նման խնդիրներով դիմողների թիվը պակասում է միանշանակ իրազեկվածության բարձրացման շնորհիվ: Պակասում է, սակայն չի ավարտվում, որովհետև, միևնույն է, արևային քսուքները մենք ավելի շատ օգտագործում ենք հանգստի մեկնելիս»,- եզրափակեց Հովհաննես Հովհաննիսյանը: