«Սասնա ծռերը» հանձնվեցին (ուղիղ միացում)

Այսօր` հուլիսի 31-ին, ազատագրվեց «Սասնա ծռեր» խմբավորման կողմից գրավված ՊՊԾ գունդը: Ստորև ներկայացնում ենք այսօրվա ընթացքում տեղի ունեցածը` ժամ առ ժամ արված կարճ տեքստերի և տեսանյութերի ձևաչափով:

21.40

Տիգրան Խզմալյանը հայտարարեց, որ հավաքվելու են վաղը՝ ժամը 19։30-ին։ Հանրահավաքն Ազատության հրապարակում ավարտվեց, քաղաքացիները որոշեցին երթ կազմակերպել:

20.20

Ազատության հրապարակը մարդաշատ է, հարթակին է ռեժիսոր Տիգրան Խզմալյանը, ով իր ելույթի ժամանակ ասաց, որ «Սասնա ծռեր»-ը փրկել է Հայաստանը քաղաքացիական պատերազմից:

20.10

Քիչ առաջ «Առաջին լրատվական»-ի խմբագիր Արման Բաբաջանյանն ուղիղ եթերում հայտարարեց, որ ժամը 20:00-ից «Սասնա ծռեր» խմբավորման անդամները վայր են դնելու զենքերը: Այս մասին նրան տեղեկացրել է Վարուժան Ավետիսյանը:

17.00

«Սասնա ծռերի»-ին տեղեկացրել են, որ Սեթո Նազարյանի վիրահատությունը նորմալ է անցել, գիտակցությունը տեղն է, բայց միացրած է ապարատին:

16.35

ՀՀ ոստիկանության լրատվության եւ հասարակայնության հետ կապերի վարչության պետ Աշոտ Ահարոնյանը ֆեյսբուքի իր էջում գրառում է կատարել։ Գրառումն ամբողջությամբ՝ ստորև։

«ԳԱԼԱ TV-ն տեղեկատվություն է տարածել, թե Գրիգոր Լուսավորիչ բուժկենտրոնից անհետացել է զինված խմբի անդամ Էդուարդ Գրիգորյանը: Հայտնում ենք, որ այս օրերին զինված խմբի անդամներից ոչ մեկը Գրիգոր Լուսավորիչ չի տարվել: ԳԱԼԱ TV-ին կոչ ենք անում չճշտված տեղեկություններ չտարածել»:

16.30

«Սասնա ծռերի» ֆեյսբուքյան էջում գրված է.

Տեղեկություն ստացանք, որ Արմեն Լամբարյանը ընկել է կոմայի մեջ: Հիմա փաստաբանը կայցելի նրան: 

14.00

Հիմնադիր խորհրդարանի մամլո ծառայությունը տեղեկացնում է. «Տեղեկություն ունենք, որ Սեթո Նազարյանին կրծքից վիրավորել են:

Նրան տարել են: Սակայն վիճակի մասին տեղեկություն չունենք, վիրավոր է թե մահացած»:

11.30

ՊՊԾ գնդի տարածքում պայթյուններ են հնչել:

Տեսանյութը` armtimes.com-ի

10.00

Վարուժան Ավետիսյանը հայտարարել է, որ ոստիկանն իրենց կրակոցից չի սպանվել.

«Տվյալ վայրը մեզ համար տեսանելի չէ, ամենայն հավանականությամբ, նա սպանվել է հենց իրենց աջուձախ արձակած դիպուկահարի կրակոցից: Չեմ ուզում ասել՝ միտումնավոր, բայց որ մեր կողմից չի եղել, վստահեցնում եմ»: