Գերմանիայի սահմանադրական դատարանն արգելել է Էրդողանի ուղիղ միացումը Քյոլնի հանրահավաքից

Գերմանիայի դաշնային սահմանադրական դատարանը (BVerfG) արգելել է Թուրքիայի նախագահ Ռեջեփ Թայիփ էրդողանի կողմնակիցների Քյոլնում կազմակերպվող հանրահավաքից ուղիղ եթերում հեռարձակել թուրք քաղաքական գործիչների, այդ թվում՝ Էրդողանի ճառերը։ Այս մասին հայտնել է DPA գործակալությունը։

Որոշումն ընդունվել է հուլիսի 30-ին։ Ի սկզբանե ծրագրվում էր, որ Էրդողանի և, հնարավոր է, Թուրքիայի կառավարությունը ներկայացնող քաղաքական գործիչների ուղերձները Քյոլնի ցույցի մասնակիցներին կցուցադրվեն մեծ էկրանով։ Սպասվում է, որ Թուրքիայում հեղաշրջման փորձից հետո նրան աջակցության հանրահավաքին կլինի 30 հազար մարդ։ Միաժամանակ, քաղաքում կկայանան ընդդեմ Էրդողանի մի քանի ակցիաներ, որոնք կազմակերպել են ԳԴՀ առաջատար կուսակցությունների երիտասարդական կազմակերպությունները։ Բացի այդ, իրենց ակցիան կանցկացնեն նաև աջ արմատականները։

Ինչպես տեղեկացնում է ՏԱՍՍ-ը, Գերմանիայի իրավապահ մարմինները մտավախություն ունեն, որ գործը կարող է հասնել ցուցարարների տարբեր խմբերի միջև բախումների և անկարգությունների։ Քյոլնում անվտանգությունն ապահովելու են մոտ 2.7 հազար ոստիկաններ։