Երթն ավարտվեց Ազատության հրապարակում (ուղիղ միացում)

23:00

Երթի մասնակիցների պահանջը նույնն է. ազատ արձակել «Հիմնադիր խորհրդարանի» անդամ Ալեք Ենիգոմշյանին, ինչպես նաև զանգվածային անկարգություններ կազմակերպելու կասկածանքով կալանավորված Արմեն Մարտիրոսյանին, Անդրեաս Ղուկասյանին, Դավիթ Սանասարյանին, ՊՊԾ գունդը գրավված «Սասնա ծռեր» խմբի տղաներին:

22:41

Այս պահին երթ է իրականացվում Բաղրամյան պողոտայում՝ ի պաշտպանություն «Հիմնադիր խորհրդարանի» անդամ Ալեք Ենիգոմշյանի, զանգվածային անկարգություններ կազմակերպելու կասկածանքով կալանավորված Արմեն Մարտիրոսյանի, Անդրեաս Ղուկասյանի, Դավիթ Սանասարյանի, Հովսեփ Խուրշուդյանի և ՀՀ ոստիկանության պետական պահպանության ծառայության գունդը գրաված զինյալների:

21:35

Երթը մեկանարկեց.

Րոպեներ առաջ հանրահավաքը վարող Հարություն Աղլամազյանը հայտարարեց, որ իրենք երթ են անելու Աբովյան փողոցով, Հանրապետության հրապարակով, Ամիրյան փողոցով, Մաշտոցի պողոտայով շարժվելու են դեպի նախագահական նստավայր։

20:46

Ազատության հրապարակում մեկնարկեց հանրահավաքը՝ նախատեսվածից բավականին ուշ՝ «Սասնա ծռեր» վանկարկումներով:

Աղլամազյանը հանրահավաքի սկզբին նշեց, որ խոսափողն ազատ է՝ յուրաքանչյուրը կարող է բարձրանալ հարթակ և ելույթ ունենալ:

Այդ հայտարարությանը հաջորդեցին հավաքի մասնակից քաղաքացիներից մի քանիսի ելույթները, ովքեր ներկայացրին իրենց դիտարկումներն ու պահանջները երևանյան վերջին իրադարձությունների առնչությամբ:

Ազատության հրապարակում էին նաև Ազգային ժողովի «Ժառանգությսն» խմբակցության ղեկավար Զարուհի Փոստանջյանը, «Ժողովրդավարական հայրենիք» կուսակցության նախագահ Պետրոս Մակեյանը, «Ղարաբաղ» կոմիտեի անդամ Աշոտ Մանուչարյանը և այլք:

Այսօր ժամը 19:00-ին հայտարարված էր հանրահավաք Ազատության հրապարակում.

Հիշեցնենք, որ Հուլիսի 17-ի առավոտյան մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք և բռնության սպառնալիքով պահել այնտեղ գտնվող անձանց՝ պահանջելով ազատ արձակել մոտ մեկ ամիս առաջ մի խումբ անձանց կողմից ապօրինի կերպով զենք և ռազմամթերք ձեռք բերելը, փոխադրելը և պահելը կազմակերպելու մեղադրանքով կալանավորված Ժիրայր Սեֆիլյանին: ՀՀ ոստիկանության պարեկապահակային ծառայության գնդի վրա հարձակման հետևանքով զոհվել է Ոստիկանության գնդապետ Արթուր Վանոյանը: Հարձակման ընթացքում հրազենային վնասվածքներ են ստացել ՀՀ Ոստիկանության գնդապետ Արամ Հովհաննիսյանը, Ոստիկանության փոխգնդապետ Հրաչ Խոստեղյանը, Ոստիկանության ենթասպա Գագիկ Մկրտչյանը:

Պատանդ վերցվածներն ազատ են արձակվել մեկ շաբաթվա ընթացքում, սակայն հուլիսի 27-ին նրանք կրկին պատանդ են վերցրել բուժօգնության հասած բուժաշխատողներին:

Հուլիսի 30-ին գնդի տարածքից դիպուկահարի կրակոցից զոհվել է ոստիկանության զորքերի ծառայող Յուրի Տեփանոսյանը:

Հուլիսի 31-ին զինված խմբի անդամները վայր են դրել զենքն ու հանձնվել: