Արսեն Մկրտչյանի գլխավորած պատվիրակությունն այցելել է Գերմանիա

ՀՀ արդարադատության նախարարի առաջին տեղեկալ Արսեն Մկրտչյանի գլխավորած պատվիրակությունը «Իրավական ակտերի մասին», ‹‹Անհատական և կոլեկտիվ հանրագրերի մասին›› օրենքների նախագծերի ու հարակից հարցերի քննարկման համար 2016 թվականի սեպտեմբերի 12-15-ը հանդիպումներ է ունեցել Գերմանիայի Դաշնային Հանրապետության պետական մարմիններում։ Պ ատվիրակության այցը կազմակերպվել էր Գերմանիայի միջազգային համագործակցության ընկերության(GIZ) «Հարավային Կովկասում եվրոպական չափորոշիչներին իրավական համապատասխանեցում» ծրագրի շրջանակում: Այս մասին տեղեկացրին ՀՀ արդարադատության նախարարության տեղեկատվության և հասարակայնության հետ կապերի վարչությունից:

Պատվիրակությունը քառօրյա այցի ընթացքում եղել է Ստորին Սաքսոնիայի պետական գրասենյակում, նույն երկրամասի և ԳԴՀ Դաշնային արդարադատության նախարարություններում, քննարկել օրենսդրության պլանավորման, կարգավորման ազդեցության տրամադրման, օրենսդրական մշտադիտարկման կազմակերպման գերմանական փորձի, ինչպես նաև օրենսդրական նախագծերի կազմման, շահագրգիռ կողմերի հետ դրանց քննարկման, կարծիքների ամփոփման, ծախսային ազդեցության առանձնահատկությունները:

ԳԴՀ Դաշնային արդարադատության նախարարության աշխատակիցները հայաստանյան պատվիրակությանն են ներկայացրել օրենսդրության մշակման գործընթացում տեղեկատվական տեխնոլոգիաների կիրառման գերմանական մոդելը, մասնավորապես՝ օրենսդրության մշակման, լրամշակման գործընթացում e-norm համակարգի աշխատանքի առանձնահատկությունները:

Սեպտեմբերի 15-ին Գերմանիայի Դաշնային Հանրապետության Բունդեսթագի հանրագրերի հանձնաժողովի աշխատակիցները ՀՀ ԱՆ ներկայացուցիչներին ծանոթացրել են հանրագրերի ներկայացման ընթացակարգին ու էլեկտրոնային եղանակով հանրագրերի ներկայացման առանձնահատկություններին: