Պետական գործչի էտալոն

Սեպտեմբերի 16-ին ՀՀ նորանշանակ վարչապետ Կարեն Կարապետյանի որոշմամբ Գագիկ Մարտիրոսյանը նշանակվեց Հայաստանի Հանրապետության վարչապետի գլխավոր խորհրդականի պաշտոնում։ Սա Կարապետյանի առաջին նշանակումն էր և այդ իսկ պատճառով մեծ հետաքրքրություն առաջացրեց հանրության շրջանում։

Պարզվում է նշանակումն արդարացված է, և պարոն Մարտիրոսյանը իրոք կկարողանա մասնագիտական լուրջ գործունեություն իրականացնել իր պաշտոնավարման ընթացքում, քանի որ ՀՀ անկախացումից ի վեր (նույնիսկ ավելի վաղ շրջանից) նա զբաղեցրել է պաշտոններ իշխանության բարձրագույն օղակներում։ Գագիկ Մարտիրոսյանն իր երկարամյա աշխատանքային գործունեության ընթացքում մշտապես աչքի է ընկել իր անբասիր վարքագծով, բարձր պրոֆեսիոնալիզմով և մշտապես վայելել է աշխատանքային գործընկերների հարգանքը։ Ինչ խոսք, սա պետական համակարգում երկար տարիներ աշխատած գործչի եզակի օրինակ է, որն արժանի է ամենաբարձր գնահատականի։

Գագիկ Մարտիրոսյանը ծնվել է 1951 թ. հունվարի 14-ին՝ Եղեգնաձորի շրջանի Գլաձոր գյուղում։ 1969-1974 թթ. սովորել է Երևանի Կ. Մարքսի անվ. պոլիտեխնիկական ինստիտուտում՝ Արդյունաբերական և քաղաքացիական շինարարության ինժեներ-շինարար մասնագիտությամբ։ Անկուսակցական է։ Ամուսնացած է, ունի երկու երեխա։

Ստորև ներկայացնում ենք Գագիկ Մարտիրոսյանի աշխատանքային երկարամյա գործունեության՝ մեզ հայտնի դարձած մանրամասները՝

1974-1979 թթ.՝ Հայկական ՍՍՀ շինարարության մինիստրության «Ջերմուկշին» տրեստ՝ Եղեգնաձորի շինարարական մեքենայացված շարասյան բրիգադիր, վարպետ, գլխավոր ինժեներ, պետ

1979-1980 թթ.՝ Եղեգնաձորի շրջխորհրդի գործկոմ՝ կազմբաժնի վարիչ, նախագահի տեղակալ

1980-1986 թթ.՝ Հայկական ՍՍՀ շինարարության մինիստրության «Ջերմուկշին» տրեստ՝ գլխավոր ինժեներ, կառավարիչ

1986-1987 թթ.՝ Հայկական ՍՍՀ արդյունաբերական շինարարության մինիստրության թիվ 14 տրեստի կառավարիչ

1987 թ.՝ Հայկական ՍՍՀ շինարարության մինիստրություն՝ արդյունաբերության և շինինդուստրիայի վարչության պետ

1987-1988 թթ.՝ Հայկական ՍՍՀ արդյունաբերական շինարարության մինիստրության «Արարատարդշին» տրեստի կառավարիչ

1988-1990 թթ.՝ Հայկական ՍՍՀ Պետշին՝ շինարարական արդյունաբերության գլխավոր տեխնոլոգիական վարչության պետի տեղակալ, նախագահի առաջին տեղակալ

1990-1993 թթ.՝ ՀՀ շինարարության մինիստր (այնուհետև՝ ՀՀ շինարարության նախարար),

1993-1995 թթ.՝ ՀՀ պետնախարար,

1995-1998 թթ՝ ՀՀ էներգետիկայի նախարար,

1998-1999 թթ.՝ ՀՀ արտադրական ենթակառուցվածքների գործունեությունը համակարգող նախարար,

1999 թ.՝ ՀՀ վարչապետի խորհրդական, ՀՀ կառավարության աշխատակազմի Վարկերի, դրամաշնորհների, մարդասիրական օգնության համակարգման և վերահսկման գլխավոր վարչության պետի պաշտոնակատար

2001-2002 թթ.՝ ՀՀ կառավարությանն առընթեր ջրային տնտեսության պետական կոմիտեի նախագահ, ՀՀ վարչապետի խորհրդականի պարտականությունների կատարող,

2002-2004 թթ.՝ ՀՀ կառավարությանն առընթեր ջրային տնտեսության պետական կոմիտեի նախագահ,

2004-2008 թթ.՝ ՀՀ վարչապետի խորհրդական,

2008-2014 թթ.՝ ITERA International Energy L.L.C (Մոսկվա)՝ շինարարության և էներգետիկայի հարցերով փոխնախագահ

2014-2016 թթ.՝ «Կապի նորարարական համակարգեր» ԲԲԸ (Ս. Պետերբուրգ)՝ խորհրդի նախագահ,

2016թ. սեպտեմբերի 16-ից՝ ՀՀ վարչապետի գլխավոր խորհրդական։

Պարգևատրվել է «Մարշալ Բաղրամյան», «Անանիա Շիրակացի» մեդալներով, ՌԴ շինարարների միության ոսկե մեդալով, ՌԴ նախագահ Վլադիմիր Պուտինի կողմից ՌԴ Պատվո շքանշանով՝ Սոչիում օլիմպիական ձմեռային խաղերի նախապատրաստման և անցկացման գործում ունեցած ներդրման համար, արժանացել է ՀՀ վարչապետի շնորհակալագրի: Տեխնիկական գիտությունների դոկտոր է: