Զարուհի Փոստանջյանը կոչ արեց պատգամավորներին միանալ մտավորականների նախաձեռնած արշավին

Այսօր Ազգային ժողովի արտահերթ նիստի ընթացքում «Ժառանգություն» խմբակցության պատգամավոր Զարուհի Փոստանջյանը կոչ արեց պատգամավորներին միանալ «Արդարություն Հայաստանում» ստորագրահավաքին, որը նախաձեռնել են աշխարհի մտահոգ հայերը:

«Մի քանի օր առաջ համաշխարհային մեծության հայազգի մշակութային գործիչները անդրադարձ են կատարել ՀՀ-ում տիրող իրավիճակին, հանրային և քաղաքական կյանքի նկատմամբ գնահատականներ են տրվել նրանց կողմից: «Արդարություն Հայաստանում» վերնագրով change.org կայքէջում այս պահին կազմակերպված է ստորագրահավաք: Ես Ձեզ բաժանել եմ այս հայտարարությունը՝ իրենց կողմից ներկայացված»,- ասաց Փոստանջյանը հավելելով՝ «ովքեր դեռ ծանոթ չեն, կխնդրեմ ծանոթանան հայտարարության տեքստին, և ովքեր դեռ չեն միացել, կոչ եմ անում միանալ այս հայտարարությանը»: 

Հիշեցնենք, որ «Արդարություն Հայաստանում» արշավի մեկնարկը տվել են Սերժ Թանկյանը, Վահե Բերբերյանը, Ատոմ Էգոյանը և այլ մտավորականներ համայն աշխարհից: