ՀՀԿ-ն մնում է Հայաստանի ամենաառանցքային և ամենաազդեցիկ քաղաքական ուժը. Էդուարդ Շարմազանով

ԱԺ ՀՀԿ խմբակցության պատգամավոր, փոխխոսնակ Էդուարդ Շարմազանովը հոկտեմբերի 2-ին կայացած ՏԻՄ ընտրությունները որակում է մրցակցային և քաղաքական: «Բոլոր խնդիրներով հանդերձ՝ Վանաձորում և Գյումրիում կայացած ընտրությունները ցույց են տվել, որ անցումը խորհրդարանականին նորմալ ընթանում է, կուսակցությունները կարողանում են ազատ ընտրապայքարի միջոցով ընտրողին ներկայացնել իրենց ծրագրերը: ՀՀԿ-ն համարում է, որ դրանք մրցակցային էին»,-ԱԺ-ում լրագրողների հետ զրույցում ասաց պատգամավորը՝ ընդգծելով, որ 2016թ. ընտրությունները ցույց տվեցին, որ մրցակցային ընտրությունները Հայաստանում այլևս այլընտրանք չունեն:

«Սա շատ կարևոր է: Այս ընտրությունները մրցակցային էին, ժողովրդավարական, իսկ ամենակարևորը՝ կար գաղափարների և ծրագրերի բախում»,- հավելեց նա:

Պատգամավորը շեշտեց նաև, որ այս արդյունքները սպասելի էին, իսկ իրենց կուսակցությունում շատ լավ գիտեին ինչպես թույլ, այնպես էլ ուժեղ կողմերը:

«Կուսակցությունում շատ լավ գիտեն իրենց ուժեղ և թույլ կողմերը: Ցանկանում ենք շնորհակալություն հայտնել վանաձորցիներին և գյումրեցիներին, որ իրենց ձայների մեծ մասը տվել են Հանրապետական կուսակցությանը: Ես ցանկանում եմ շնորհավորել նաև բոլոր այն կուսակցությունների ներկայացուցիչներին, ովքեր ընտրվել են Գյումրու և Վանաձորի ավագանու անդամ»,- ասաց Շարմազանովը:

Պատգամավորի խոսքով՝ այս ՏԻՄ ընտրությունների արդյունքները ևս ցույց են տալիս, որ ՀՀԿ-ն շարունակում է մնալ Հայաստանի ամենաառանցքային և ամենաազդեցիկ քաղաքական ուժը: «Մյուս համայնքներում կայացած ՏԻՄ ընտրությունների արդյունքները ևս սպասելի են եղել իշխող կուսակցության համար, և հիմնական համայնքներում ՀՀԿ-ն կարողացել է հաջողության հասնել»,- եզրափակեց նա:

Արմինե Եփրեմյան