Քաղաքականության մեջ անշահախնդիր մարդկանց տոկոսը չափազանց քիչ է. Նիկոլ Փաշինյան

«Երեկ Գյումրիում և Վանաձորում «Քաղաքացիական պայմանագիր» կուսակցության պարտությունը պետք է վերլուծել»,- ԱԺ-ում լրագրողների հետ զրույցում անդրադառնալով իր կողմից հայտարարությանն, ասաց ՔՊ վարչության անդամ, ՀԱԿ խմբակցության պատգամավոր Նիկոլ Փաշինյանը: «Այս պահի դրությամբ ես որևէ պաշտոնական տեղեկատվություն չունեմ լցոնումների ու մյուս խախտումների մասին: Թեև երեկ Վանաձորում և Գյումրիում նկատվել են որոշակի խախտումներ, սակայն մարդիկ այդ մասին չեն ուզում բարձրաձայնել:

Նրա խոսքով՝ իրենք կուսակցությունում արդեն սկսել են քննարկումները և առաջիկայում որոշումներ կկայացնեն հետագա անելիքների հետ կապված, սակայն պատգամավորը շեշտեց, որ այս ընտրությունները ևս մեկ անգամ ցույց տվեցին, որ մեր իրականության մեջ ոչինչ էլ չի փոխվել:

«Քաղաքականության մեջ անշահախնդիր մարդիկ չափազանց քիչ են: Մարդիկ պետք է գիտակցեն, որ քաղաքական գործչի հետ խնդիր ունեն լուծելու, բայց դա չեն ուզում ընդունել ու ընկալել: Մեզ մոտ իրողությունն այլ է: Մարդիկ կարծում են, որ եթե որևէ քաղաքական գործչի հետ համագործակցում են, ուրեմն քաղաքական կոնկրետ շահ պետք է հետապնդել: Այսինքն՝ մեկն ակնկալում է ուսման հարց լուծել, մյուսը՝ աշխատանքի, բիզնեսի, և այլն, և այլն: Այսինքն՝ այս տարիների ընթացքում սա դարձել է հստակ քաղաքական իրողություն: Հիմա՝ ինչպես պետք է վարվել այդ իրողության հետ, ես չեմ կարող ասել»:

Լրագրողի հարցին՝ շարունակո՞ւմ եք պնդել, որ ՀՀ-ում հնարավոր է ընտրությունների միջոցով իշխանափոխություն կատարել, Փաշինյանը պատասխանեց. «Ես շարունակում եմ պնդել, որ առանց ժողովրդի կամարտահայտման իշխանափոխություն հնարավոր չէ անել, որովհետև ժողովուրդն այն գործոնն է, որը որոշումներ է կայացնում: Համենայնդեպս, ինձ համար ես անհնար եմ համարում իշխանափոխություն առանց ժողովրդի կամարտահայտման: Իշխանափոխությունն արվում է հանուն ժողովրդի, ոչ թե ի հեճուկս նրա»,- ասաց Փաշինյանը:

Հարցին, թե նման պարտությունից հետո հնարավո՞ր է հրաժարվեք մասնակցել առաջիկա խորհրդարանական ընտրություններին, Փաշինյանը հայտարարեց, թե կուսակցությունը առաջիկայում քննարկումներ կկազմակերպի, որոշումներ կկայացնի, որից հետո նոր կհայտարարեն առաջիկա անելիքների մասին: Լրագրողները պատգամավորից հետաքրքրվեցին նաև, թե տարօրինակ չէ՞, որ «Հայկական վերածնունդ» կուսակցությունն ավելի շատ ձայն հավաքեց, քան՝ առանցքային ընդդիմադիր կուսակցությունը, Փաշինյանը հայտարարեց, որ իրեն ընդհանրապես զարմացրեց, որ ՀՀԿ-ն այս ընտրություններին Վանաձորում, Կապանում և այլ տեղերում հաղթանակ տարավ:

Իսկ թե ձայների վաճառք եղե՞լ է ընտրատեղամասերում, Փաշինյանը դժվարացավ ստույգ պատասխանել, նշելով, որ ընտրությունների արդյունքները ճնշող մեծամասնությամբ ձևավորվել են հետևյալ կերպ: «Ընտրողները եկել են, քվեարկել, քվեատուփը գցել քվեախցիկում: Այս պահին ես այդպիսի տեղեկություն չունեմ»,- ասաց պատգամավորը, հավելելով, որ և ընտրակաշառքի մասին ինքը կխոսի այն ժամանակ, երբ մեկ անձ կանգնի և տեսախցիկների առաջ հստակ հայտարարի, որ իրեն կաշառք են առաջարկել:

Արմինե Եփրեմյան