ՀՀԿ-ն նախկինում համեստություն էր անում. Վահրամ Բաղդասարյանը՝ ՏԻՄ ընտրությունների մասին

«Ես խնդրում եմ չշտապել, պաշտոնական տվյալները կլինեն և, երբ վերջնական տոկոսները լինեն, կլինեն նաև բանակցություններ»,- ԱԺ-ում լրագրողների հետ զրույցում ամփոփելով ընտրությունների արդյունքները, ասաց ՀՀԿ խմբակցության ղեկավար Վահրամ Բաղդասարայանը՝ պատասխանելով հարցին՝ հնարավո՞ր է ՀՀԿ-ն դաշինք կազմի որևէ քաղաքական ուժի հետ:

Հարցին, եթե ընդդիմությունը դաշինք կազմի՞, Բաղդասարյանն հավելեց. «Մենք որևէ բան չենք բացառում, բայց համենային դեպս, եթե դուք տեսնում եք պատկերն ու իրավիճակը, ինձ թվում է, որ իշխանության հետ դաշինք կազմելու հավանականությունն ավելի շատ է: Մենք խտրականութուն չենք դնում, թե ում հետ դաշինք կկազմենք, այն բոլոր քաղաքական ուժերի հետ, որոնք հաղթահարել են շեմը, կլինեն բանակցություններ, որոնց հետ մեր նպատակները, մեր ծրագրերը կունենան եզրեր, մենք պատրաստ ենք դաշինք կազմել»:

Իսկ ընդհանուր առմամբ, ըստ Բաղդասարյանի, այս ընտրությունները որակական տեղաշարժ են գրանցել: «Մենք հասկացանք, որ խորհրդարանական համակարգն արդարացված է մրցակցային պայքարում և տեսանք, որ որակական տեսանկյունից ինչպիսի արդյունքներ գրանցվեցին: Նաև մի քանի տոկոս մեր կանխատեսածից ավելի բարձր է եղել, նախօրոք մենք համեստություն էին անում: Վանաձորում մենք կանխատեսում էինք 35 տոկոս: Ավելի մրցակցային էր Գյումրին, այնտեղ պարզապես քիչ կուսակցություններ հաղթահարցին շեմը, ընդամենը չորս կուսակցություն»,- ասաց նա:

Արմինե Եփրեմյան