Վիգեն Սարգսյանը՝ «այլընտրանքային արտգործնախարար»

Երեկ կատարվեցին կառավարության վերջին երկու ամենաինտրիգային նշանակումները:

Ըստ ամենայնի, նախագահ Սերժ Սարգսյանը մանևրելու մեծ հնարավորություն չուներ և, ըստ էության, հարկադրված էր ԱԳ նախարարի պաշտոնում վերանշանակել Էդվարդ Նալբանդյանին: Հեռու եմ մակերեսային պատկերացումներից և այս ամենում չեմ փնտրում Մոսկվայի ուղղակի պարտադրանք: Ավելի շուտ Երևանը մեսիջ հասցեագրեց Մոսկվային, որ գոնե ֆորմալ առումով Հայաստանի արտաքին քաղաքականությունը նրա եվրասիական ուղղվածությունը չի վերանայվելու: Իհարկե, Նալբանդյանի վերանշանակումը ենթադրում է նաև ստատուս քվոյի պահպանում մեր դիվանագիտությունում: Եթե անկեղծ լինենք և իրերը կոչենք իրենց անուններով, ապա այսօրվա հայկական դիվանագիտությունը հեռու է որակյալ և նախաձեռնող լինելուց:

Մի խոսքով՝ այնպիսին չէ, ինչպիսին պետք է լիներ իրապես ինքնիշխան երկրի արտաքին քաղաքականությունը: Սա, իհարկե, պայմանավորված չէ միայն ու բացառապես Նալբանդյանի անձով, բայց վերջինս օբյեկտիվորեն կամ սուբյեկտիվորեն դարձել է անարդյունավետ և «անկյալ» դիվանագիտության խորհրդանիշ:

Այնպես է ստացվել, որ մեր ԱԳՆ-ի իներցիոն ոչ պրոդուկտիվ գործունեության ֆոնին, հենց բանակն է դարձել մեր ինքնիշխանության, պետականության խորհրդանիշ: Այդ գործառույթը բանակը կատարել է ոչ միայն ռազմի դաշտում, այլ նաև դիվանագիտության մեջ՝ լրացնելով ԱԳՆ-ի՝ ակնհայտ անգործության բացը: Եվ, բնավ պատահական չէ, որ Հայաստանում հավատարմագրված դիվանագետները ավելի հաճախ կարևորել են ոչ թե ԱԳՆ, այլ ՊՆ ղեկավարության դիրքորոշումները: Հենց ռազմաքաղաքական դիվանագիտության առաջնահերթությունը՝ ի թիվս այլ գործոնների, կանխորոշեց Սեյրան Օհանյանի հեռացումը:

ՀՀ ՊՆ-ին այսօր պետք է ոչ թե զինվորական, այլ քաղաքական դեմք: Մի մարդ, ով արդյունավետ կիրականացնի ռազմաքաղաքական դիվանագիտություն, կկարողանա վարել հնարավորինս դիվերսիֆիկացված արտաքին քաղաքականություն՝ Արևմուտքի և Ռուսաստանի հակադրության ֆոնին, ընդգծելով Հայաստանի ինքնիշխանությունը:

Այս առումով Վիգեն Սարգսյանի թեկնածությունն ամենաօպտիմալն ու ընդունելին է:

Կասկածից վեր է, որ արտաքին քաղաքական հարցերում շեշտակի մեծանալու է բանակի դերակատարությունը: Ըստ այդմ, արտաքին հարաբերություններում Նալբանդյանի անգործությունը կարող է փոխհատուցվել Վիգեն Սարգսյանի նախաձեռնողականությամբ:

Սարգիս Հակոբյան