Սա քաղաքական շատ լավ կուլտուրա է. Նիկոլ Փաշինյանը՝ ՔՊ վարչության հրաժարականի մասին

Նշանակվել է արտահերթ համաժողով, որտեղ ընտրվելու է նոր վարչություն: Համաժողովում կարող է նաև վարչության անդամների մի մասը վերընտրվել և որևէ վարչության անդամ կաշկանդված չէ նորից առաջադրելու իր թեկնածությունը: Այս մասին այսօր Ազգային ժողովում լրագրողների հետ զրույցում ասաց ՔՊ կուսակցության վարչության անդամ, պատգամավոր Նիկոլ Փաշինյանը՝ անդրադառնալով կուսակցության վարչության հրաժարականին:

Պատգամավորը պատասխանելով` ի՞նչ պատճառով է ՔՊ-ի վարչությունը հրաժարական ներկայացրել հարցին, ասաց. «Կա վիճակագրություն, որ մենք փաստացի մասնակցել ենք 6 ընտրությունների, որոնցից միայն մեկում ենք հաղթանակ տարել, չնայած ավագանու ընտրություններում որոշակի հաջողություն ունեցել ենք: Վարչությունն արձանագրեց՝ այս վիճակագրության հետ համաձայն չէ և իր բաժին պատասխանատվությունը ստանձնում է»:

Ըստ Փաշինյանի՝ սա քաղաքական շատ լավ կուլտուրա է, երբ պարզ է դառնում, որ մեխանիզմը լավ չի աշխատում, ուրեմն դա պետք է առնվազն արձանագրել:

«Մենք պարտության պատճառները կվերլուծենք համաժողովի նախապատրաստական փուլում, վարչության անդամության թեկնածուների նախընտրական արշավի ընթացքում, ամենօրյա ռեժիմով սկսելու ենք քննարկումներ»,- ասաց նա:

Նշեց նաև, որ կուսակցությունը լքելու ցանկություն ոչ ոք չի հայտնել և եթե այս իրադարձությունը հայաստանյան քաղաքականության համակարգում արտառոց երևույթ է, իրենց կուսակցության համար դա չպետք է համարվի արտառոց. «Երբ վարչության անդամ էին առաջադրվում, ասում էին, որ պատրաստ են ստանձնել պատասխանատվություն՝ այդ թվում քանակական: Եթե ընտրություններում հաղթեինք, նման հարց չէր առաջանա, եթե այս ճանապարհով իշխանափոխություն չենք արել մենք, պետք է որոշակի վերանայումներ անենք մեր գործողություններում, հասկանանք՝ որտեղ ենք հաջողել, որտեղ չենք հաջողել, սա կուսակցության առողջության նշան է»: