Շարմազանովը հույս ունի, որ նոր կառավարությունը դրական տեղաշարժեր կարձանագրի բոլոր ոլորտներում

Սահմանադրական բարեփոխումների ընդունումից հետո Հայաստանում ձեւավորվել է մի իրավիճակ, որը պահանջում է խաղի նոր կանոններ: Ազգային ժողովում հայտարարությունների ժամին այս մասին ասաց ԱԺ փոխնախագահ Էդուարդ Շարմազանովը: «Վերջին զարգացումներն ակնառու դարձրեցին բարեփոխումներից բխող համակարգային, լայնածավալ փոփոխությունների անհրաժեշտությունը: Այլեւս ձեւավորված է նոր կառավարություն, որը, հուսով եմ, կներկայացնի այնպիսի հավակնոտ ծրագրեր, որոնց իրականացումը հնարավորություն կտա արձանագրել դրական տեղաշարժ հանրային կյանքի բոլոր ոլորտներում»,-  ընդգծեց Շարմազանովը:

Նրա խոսքով՝ դա լինելու է երկարատեւ գործընթաց, եւ իշխանությունն անելու է հնարավորը դրական արդյունքների ապահովման ուղղությամբ:

ԱԺ փոխնախագահն անդրադարձավ նաև Հայաստանում տեղի ունեցած տեղական ինքնակառավարման մարմինների ընտրություններին: «Օրերս Հայաստանի շուրջ 400 համայնքում տեղի ունեցան ընտրություններ: Գյումրիում եւ Վանաձորում այդ ընտրություններն առաջին անգամ ընթացան կուսակցական ցուցակներով: Մի բան ակնհայտ է՝ ընտրությունները մրցակցային էին, իսկ արդյունքները՝ հիմնականում սպասելի: Այս ընտրությունները ցույց տվեցին, որ Հայաստանում խորհրդարանական համակարգին անցումը կայացած փաստ է, որտեղ առաջնային են դառնում ոչ թե անձերի միջեւ բախումները, այլ կուսակցութjունների դերն ու նրանց միջեւ առկա ազատ մրցակցությունը»,- նշեց Շարմազանովը:

Նա հավելեց՝ հեռու լինելով «մեր դեմ խաղ չկա» ժանգոտած սկզբունքից՝ ընտրության արդյունքներով արձանագրվեց, որ Հանրապետականը շարունակում է մնալ քաղաքական դաշտի առանցքային եւ ամենաազդեցիկ խաղացողը, իսկ ընդդիմադիր դաշտում ի հայտ եկան նոր ֆավորիտներ: «Այս ամենը հույս է ներշնչում, որ քաղաքական ապագա գործընթացները կընթանան քաղաքական մշակույթի եւ ազնիվ մրցապայքարի կանոններով, քանի որ դա է մեր քաղաքացիների շահերից բխող միակ ճշմարիտ ուղին»,- եզրափակեց ԱԺ փոխնախագահը: