Տիգրան Մուկուչյանը պարզաբանել է Գյումրիում ավագանու մանդատների բաշխման տրամաբանությունը

Կենտրոնական ընտրական հանձնաժողովի նախագահ Տիգրան Մուկուչյանը պարզաբանումներ է ներկայացրեց Գյումրու ՏԻՄ ընտրությունների արդյունքներով մանդատների վիճահարույց թվի կապակցությամբ: Ազգային ժողովում լրագրողների հետ զրույցում Տիգրան Մուկուչյանը պարզաբանեց, որ նախ արձանագրվում է կուսակցությունների կողմ ձայների քանակը, հետո որոշվում է, թե որ կուսակցություններն են հաղթահարել 6 տոկոսի շեմը, որպեսզի նրանց մանդատ տրվի: 6 տոկոսից ավելի հավաքել են «Բալասանյան» դաշինքը, ԲՀԿ-ն, ԳԱԼԱ-ն, «Հայկական վերածնունդը»: «Կա մանդատների հստակ թիվ' 33 մանդատ, դրանք համամասնորեն բաշխվում են: Ըստ այդմ, նախնական տվյալներով «Բալասանյան» դաշինքը հավաքել է 14,8 տոկոս, ԲՀԿ-ն՝ 9,22 տոկոս, ԳԱԼԱ-ն՝ 4,46 տոկոս և «Հայկական վերածնունդը»՝ 4,52 տոկոս: Օրենքը սահմանում է, որ եթե պարզվում է, որ որևէ մեկը ստացել է տեղերի 40 տոկոսից ավելին, սակայն ոչ ավելի, քան կեսից ավելին, ապա տրվում է լրացուցիչ մանդատ, մինչև ապահովվի 51 տոկոսը»,- մանրամասնեց Մուկուչյանը:

ԿԸՀ նախագահը հստակեցրեց, որ մանդատը որևէ մեկից չի վերցվում ու տրամադրվում որևէ մեկին, կանոն է սահմանված: Նրա խոսքով՝ 40 տոկոսից ավել հավաքած «Բալասանյան» դաշինքը 17 մանդատ ստանում է, որպեսզի ապահովվի անհրաժեշտ 51 տոկոսը: «Հիմա ընդունելով նախնական քվեարկության արդյունքները՝ ստացվում է, որ «Բալասանյան» դաշինքը կստանա 17, ԲՀԿ-ն՝ 8, ԳԱԼԱ-ն՝ 4, «Հայկական վերածնունդ»-ը՝ 4 մանդատ»,- ասաց Տիգրան Մուկուչյանը:

Հարցին, թե ինչպես կմեկնաբանի ԳԱԼԱ-ի մտադրությունը՝ դատական կարգով վիճարկել այդ ցուցանիշները, նա նշեց, որ դա նրանց իրավունքն է, սակայն հստակություն չկա՝ վիճարկելը վերաբերելու է տարածքային ընտրական հանձնաժողովի որոշմանը, թե օրենքի դրույթին:

ԲՀԿ-ն և ԳԱԼԱ-ն հայտարարում են, որ Գյումրիում մանդատների թիվը սխալ է բաշխվում և «Բալասանյան» դաշինքը 15 մանդատից ավել չի կարող ունենալ: