Ներքին աուդիտ անցկացրեք, որպեսզի հետագայում մեզ չմեղադրեք. Հերմինե Նաղդալյան

Ազգային ժողովի օրակարագում ընդգրկված է ԿԸՀ նախագահի և հանձնաժողովի կազմի ընտրության հարցը:

Նիստի մեկնարկին արտահերթ ելույթով հանդես եկավ ԱԺ փոխնախագահ Հերմինե Նաղդալյանը, ով իր խոսքում քաղաքական ուժերին ևս մեկ անգամ հորդորեց հաշվարկել իրենց հնարավորությունները, որպեսզի հետագայում նրանք չմեղադրեն իշխանություններին:

«Մեր գործընկերներն անընդհատ փորձում են ԿԸՀ հարցը քաղաքականացնել, սակայն դա տեղին չէ: Այո, մեր երկրում եղել են ժամանակներ, երբ ԿԸՀ-ն քաղաքական խաղացող էր, երբ քաղաքական խնդիրներ էր դնում ու լուծում, երբ թույլ էր տալիս բազմաթիվ կեղծիքներ, որոնք լինում էին նաև այլ հանձնաժողովներում, բայց փոխվել են ինչպես ժամանակները, այնպես էլ՝ իրավիճակը, ինքներդ դա ասացիք»,- հայտարարեց նա:

Հերմինե Նաղդալյանը հորդորեց քաղաքական ուժերին ու գործիչներին գնալ փոփոխությունների ճանապարհով և ընդգծեց, որ պետք է դադարեցնել կեղծիքների այդ գործընթացը: «Սա է մեր քաղաքական պահանջը: Սա է մեր քաղաքական դիրքորոշումը և քաղաքական դիրքորոշումների տարբերությունը»,-հավելեց նա:

Նաղդալյանը շեշետեց, որ ԿԸՀ-ն ընդամենը գործիք է, որն ամփոփում է ընտրական արդյունքները, սակայն այդ կառույցը չի կարող դուրս գալ գործող իրավական նորմերից և արդյունքներ փոխել: «ԿԸՀ լիազորությունները պետք է համապատասխանեն գործող ԸՕ կանոններին և որևէ այլ բան անել չի կարող: Թող Տիգրան Մուկուչյանն ու մյուսները ինձնից չնեղանան, բայց ԿԸՀ-ն ընտրական արդյունքների վրա չունի և չի կարող ունենալ որևէ ազդեցություն»,- ասաց նա:

Դիմելով քաղաքական ուժերին, որոնք մասնավորապես մասնակցել են վերջին ՏԻՄ ընտրություններին, նա նախ նկատեց, որ թեև չեն եղել բողոքներ, բայց այդ ուժերը փորձում են հասարակական կարծիք փոխել, ապա ընդգծեց. «Հավաստիացնում եմ բոլորիդ. ո՛չ Տիգրան Մուկուչյանը, ո՛չ էլ ԿԸՀ-ն Ձեր հաջողությունների ու անհաջողությունների համար պատասխանատու չեն: Եթե կան քաղաքական ուժեր, որոնք փորձում են իրենց վարչությունների կազմը փոփոխել, ապա ԿԸՀ նախագահի հետ դա որևէ կապ չունի: Նաև ուզում եմ ասել, որ ՀՀԿ-ն քաղաքական դաշտում առանցքային ուժ է, ընդունեք այս իրողությունը և աշխատեք ընտրողի հետ: Սա է ճանապարհը, որը ո՛չ ես եմ հնարել, ո՛չ էլ՝ դուք...

Ուզում եմ քաղաքական ուժերին հորդորել. Մինչև խորհրդարանական ընտրությունները բավարար ժամանակ կա, ներքին աուդիտ անցկացրեք, օբյեկտիվ հաշվարկեք ձեր հնարավորություններն ու ցանկությունները, որ հետագայում Տիգրան Մուկուչյանին ու ՀՀԿ-ին չմեղադրեք Ձեր չստացած քվեների և ուրիշների ստացած վստահության քվեների համար»,- ամփոփեց պատգամավորը: