Վանաձորն ու Գյումրին` առանց քաղաքապետ

ՏԻՄ ընտրություններն ավարտված են. թե’ Վանաձորում, թե’ Գյումրիում քաղաքացիները կատարել են իրենց ընտրությունն ու հենց այդ քայլով քաղաքական բոլոր ուժերին նեղ դրության մեջ թողել: Այն աստիճան նեղ, որ փաստացի, թե’ Վանաձորը, թե’ Գյումրին դեռ նոր քաղաքապետ չունեն:

Իշխանությունն ու ընդդիմությունը իրար խառնված ձայներ են հաշվարկում, ավագանու թիվ ճշգրտում ու սպասում: Սպասում այն վերջնական պահին, երբ կազդարարվի քաղաքապետերի անունները:

Ամեն դեպքում, ավելի քան ակնհայտ է, որ երկու քաղաքում էլ քաղաքապետ են նշանակվելու ՀՀԿ թեկնածուները:

Սկսենք Գյումրիից ու սկսենք իշխանության ներկայացրած պաշտոնական տարբերակից. «Բալասանյան» դաշինքն ունի 17 մանդատ, ասել է թե բավական ձայն, որ իր թեկնածուին քաղաքապետ նշանակի:

Ունի, սակայն դեռ քայլ չի արվել: Հապաղում են: Անգամ Բալասանյանին դեռ չեն շնորհավորել, դեռ վիճելի հարցեր կան:
Սպասում են նաև ընդդիմության քայլերին, որը դեռ միասնական չէ՝ ինչպես միշտ:

ՀՎԿ-ն ու ԲՀԿ-ն դեռ երեկ են հայտարարել, որ կմիավորվեն, իսկ մեկ այլ հաղթող ուժ՝ ԳԱԼԱ-ն, դեռ քննարկում է ու նշում, որ վաղ է հայտարարել, թե Գյումրիում ընդդիմությունը միասնական է պայքարելու…

Քաղաքական պարզ առևտուր, որ հաղթանակ է նվիրում ՀՀԿ-ին:

Թեժ առևտուր է գնում նաև Վանաձորում, որտեղ իշխանությանը տապալելու մեծ շանսեր կան:

Հանրապետության երրորդ քաղաքում հանրապետականը չունի բավարար 17 մանդատը, լիարժեք հաղթանակ տոնելու համար, սակայն ունի իրար հետ նորմալ հաղորդակցվել չկարողացող ընդդիմություն:

Առավել շատ ձայներ հավաքած ՀՀԿ-ն երկու օր է առաջարկում է իրեն միանալ ՀՎԿ-ին, որն էլ առաջ է քաշում մի շարք պայմաններ, ինչը ձեռք չի տալիս Լուսավորին…

Լուսավորի պայմանն էլ ձեռք չի տալիս վերածնվածներին:

Կրկին առևտուր, որ անպտուղ է, ավելի ճիշտ պտղաբեր է, բայց ՀՀԿ-ի համար:

Այստեղ ևս ավելի քան ակնհայտ է, որ քաղաքապետ կնշանակվի հանրապետականի թեկնածուն:

Կրկին անգամ Հայաստանում ընդդիմությունը պայքարում է ընդդիմության դեմ, իսկ շահում է իշխանությունը:

Անի Սահակյան