Ճապոնացի դաշնակահարը և հայ երգչուհին հանդես եկան նույն բեմում

«Կոմիտաս» միջազգային գիտաժողով-փառատոնի շրջանակում հոկտեմբերի 5-ին Կոմիտասի թանգարան-ինստիտուտում տեղի ունեցավ ճապոնացի դաշնակահար Տակահիրո Ակիբանի և սոպրանո Տաթևիկ Մովսիսյանի համատեղ համերգը: «Վաղուց եմ ծանոթ Կոմիտասի ստեղծագործություններին: Պատահաբար գտա Արաքս Մանսուրյանի ձայնագրությունները, որտեղ նա Կոմիտաս է կատարում և չափազանց տպավորվեցի: Համերգին ներկայացնում եմ հայ կոմպոզիտորների ստեղծագործություններ, որոնք կրում են Կոմիտասի ազդեցությունը»,-նշեց Տակահիրո Ակիբան:

Դաշնակահարի խոսքով՝ նա Ճապոնիայում ստեղծած իր ընկերությունում դասընթացներ է կազմակերպում, հրավիրում է հայ ստեղծագործողների Կոմիտասին երիտասարդներին ներկայացնելու, նրա ստեղծագործությունները ճանաչելի դարձնելու համար:

«Սա մեր առաջին համագործակցությունն է: Տիգրան Մանսուրյանի «Երկիր Նաիրին» ենք կատարելու, որը տարիներ առաջ Արաքս Մանսուրյանն է ներկայացրել: Շատ հուզված ենք և սպասումներով լի»,-ասաց սոպրանո Տաթևիկ Մովսեսյանը:

Համերգին ներկա էին հայ երաժշտարվեստի սիրահարներ, որոնք ջերմ ծափողջույններով ընդունեցին ճապոնացի հյուրին և հայազգի երգչուհուն:

Ճապոնիայում Կոմիտասի անվան երաժշտական ընկերության հիմնադիր և նախագահ Տակաիրո Ակիբանը կատարեց Տիգրան Մանսուրյանի, Արամ Խաչատրյանի, Առնո Բաբաջանյանի, Գեորգի Սարաջյանի, Ալեքսանդր Հարությունյանի ստեղծագործությունները: