Քրեական հեղինակություն Ական «մաքրեց իշխանության դեմքը» Վանաձորում

Եթե նույնիսկ չլիներ Վանաձորի նախօրեի աղմկոտ միջադեպը, բացարձակապես վստահ եմ, որ գալիք երկուշաբթի օրը ԲՀԿ և «Հայկական Վերածնունդ» կուսակցության ավագանիները չէին սատարելու «Լուսավոր Հայաստանի» թեկնածու Քրիստ Մարուքյանին: Ինչքան էլ տեսանելի ու ռեալ է Վանաձորում հանրապետական իշխանությունը փոխելու հնարավորությունը, դա տեղի չի ունենա: Հետընտրական Վանաձորի զարգացումները բացահայտում են մեր քաղաքական համակարգի էությունը, քաղաքական ուժերի հրապարակային և իրական վարքագծերի կոնտրաստը: ԲՀԿ-ն և ՀՎԿ-ն նախընտրական փուլում քննադատում էին ՀՀԿ-ին, բացառում էին նրա հետ դաշինքը, իրականում այլ օրակարգ ունենալով: Ասել կուզեմ նույն ԲՀԿ-ի կամ ՀՎԿ-ի համար խնդիրը ոչ թե Վանաձորի քաղաքապետի անհասանելի աթոռն էր, այլ հետընտրական այնպիսի իրավիճակի ստեղծումը, որը թույլ կտար այս կուսակցություններին խորհրդարանական ընտրություններին Վանաձորյան քվոտայի շուրջ հանգել շահավետ պայմանավորվածությունների:

Հենց այս տրամաբանությամբ էլ Վանաձորի ավագանիում հնարավոր չեմ համարում ԼՀԿ-ԲՀԿ-ՀՎԿ դաշինքը եթե անգամ պարզ թվաբանությամբ դա մեկ քաղաքում հանգեցնելու է իշխանափոխության: Ամբողջ խնդիրն այն է, որ Էդմոն Մարուքյանը կամ «Լուսավոր Հայաստանի» քաղաքապետը ԱԺ ընտրություններում ձայների երաշխավորված քվոտա չեն կարող ապահովել ո՛չ ԲՀԿ-ի և ո՛չ էլ ՀՎԿ-ի համար:

Ըստ այդմ երկու կուսակցությունները ժպտալու են Մարուքյաններին, բայց նպաստելու են Վանաձորի Հանրապետական իշխանության վերարտադրությանը, այն հույսով կամ պայմանով, որ ԱԺ առաջիկա ընտրություններում հանրապետության երրորդ քաղաքում կստանան առնվազն այնքան քվե, ինչքան ստացել են ավագանու ընտրությունների ժամանակ:

Հոկտեմբերի 4-ին, Վանաձորում տեղի ունեցավ միջադեպ, որը նաև «գաղափարապես» անհնար դարձրեց ավագանիում ընդդիմության միավորման հնարավորությունը կամ ավելի ճիշտ անշրջելի դարձրեց հանրապետականների իշխանության վերարտադրության գործընթացը:

Ընտրական խնդիրների համատեքստում ՀՎԿ կուսակցական ցուցակի առաջատար Արկադի Փելեշյանը, հայտնի Ակա մականունով, դաժան ծեծի է ենթարկել Վանաձորի հայ ավետարանական եկեղեցու առաջնորդ Ռաֆիկ Գրիգորյանին: Վանաձորում ՀՀԿ-ԼՀԿ հակադրության, ապագա քաղաքապետի ընտրության հարցը մեծապես կախված է հենց ՀՎԿ-ի դիրքորոշումից: Վերջինի պարագայում, սակայն, գործ ունենք ոչ թե ընդդիմադիր ցուցակի, այլ դրա տակ թաքնված կրիմինալի հետ:

Քաղաքում հայտնի քրեական մի հեղինակության հետ, ով քավոր-սանիկական հարաբերություններ ունի հանրապետականների հետ և գուցե նույնիսկ իշխանությունների կողմից դիտարկվել է քաղաքապետի պահեստային տարբերակ, եթե ՀՀԿ թեկնածուն` Մամիկոն Ասլանյանը, «չմարսվեր» վանաձորցիների կողմից:

Սակայն ՏԻՄ ընտրություններին զուգահեռ հանրապետությունում տեղի ունեցան ավելի գլոբալ իրադարձություններ: Քրեաօլիգարխիան հեռացավ՝ Հովիկ Աբրահամյանի կառավարության դեմքով, նոր վարչապետ Կարեն Կարապետյանը փորձում է «մաքրել համակարգի» դեմքը: 

Այս համատեքստում Արկադի Փելեշյանը դարձել է մերժված դեմք, բայց նրա գործոնը, հոկտեմբերի 4-ի արարքն օգնեցին, որպեսզի իշխանությունը Վանաձորում «փրկի և մաքրի» իր դեմքը: Վանաձորի ավագանիում ընդդիմության միավորումն այլևս մոտիվացված չէ, որովհետև նույն «Լուսավոր Հայաստանը» չի կարող կրիմինալի օգնությամբ փակել ՀՀԿ-ի հաղթանակի ճանապարհը, մանավանդ կառավարող կուսակցությունը ներկայանում է քաղաքապետի թեկնածուով, որի անունը չի նույնանում կրիմինալի, քրեական հանցագործության հետ:

Գուցե սա էլ է քաղաքական տեխնոլոգիա: Համենայնդեպս, Քրիստ Մարուքյանը հաղթանակ կարող է տանել միայն Ակայի թիմի օժանդակությամբ, ասել է թե, կրիմինալի հետ դաշինքի միջոցով, իսկ այս ֆոնին Մամիկոն Ասլանյանի ընտրությանն այլընտրանք չի մնում:

Սարգիս Հակոբյան