Նեղանալ ու նեղսրտել չպետք է լինի. Սերժ Սարգսյանը՝ Կառավարությունում

Արդեն տեղեկացրել էինք, որ այսօր Սերժ Սարգսյանը կառավարություն է ժամանել ներկայացնելու վարչապետ Կարեն Կարապետյանի ձևավորած կաբինետը:

Երկրի ղեկավարը շնորհավորեց նորանշանակ նախարարներին պետական բարձր պաշտոններում նշանակվելու՝ ավելի ստույգ պետական բարձր պաշտոններում ծառայության անցնելու կապակցությամբ և նրանց մաղթեց հաջողություն:

Նախագահը գործադիրի անդամներին հիշեցրեց այն պատասխանատվության մասին, որ նրանք ստանձնել են: «Ակնհայտ է, որ կառավարության թիվ մեկ խնդիրը կառավարման արդյունավետության բարձրացումն է, և աշխարհում, տարածաշրջանում ու Հայաստանում մարտահրավերների պակաս չկա: Ակնհայտ է, որ ավելի հեշտ է զարգանալ, հասնել բարձր տնտեսական արդյունքների, երբ շուրջդ խաղաղ է, երբ գործընկեր երկրներն ունենում են տնտեսական աճ և շատ ավելի բարդ է, երբ կան արտաքին բացասական ազդակներ, բայց դու պարտավոր ես անել առավելագույնը և ունենալ զարգացում: Մեզ, իհարկե, անհրաժեշտ է շարունակել լինել մրցունակ և հետևողականորեն բարձրացնել մեր տնտեսության արդյունավետությունը»,- ասաց Նախագահը:

«Ես համոզված եմ, հնարավոր է, և պետք է ավելի լավ, ավելի ռացիոնալ կառավարել համեստ միջոցները և հասնել անհամեմատ ավելի լավ արդյունքների: Սահմանադրական փոփոխություններից հետո, մենք դե ֆակտո սկսել ենք համակարգային փոփոխություններ, այս տեսանկյունից ներկա կառավարությունը պետք է դառնա այս փոփոխությունների լոկոմոտիվը, շարժիչ ուժն ու իրականացնողը: Կառավարման կիսանախագահական համակարգից անցումը խորհրդարանական կառավարման, փոխում է ոչ միայն երկրի կառավարման մոդելը, այլ, առաջին հեթին, հավաքական վերաբերմունքի փոփոխության հարց է լուծում: Միգուցե մարդիկ ամբողջովին չեն էլ պատկերացնում, թե կառավարման նոր մոդելը ինչ մասշտաբներով է փոխելու մեր իրականությունը»,- ընդգծեց Սերժ Սարգսյանը:

Սարգսյանը նշեց, որ ինքը հավատում է այս Կառավարության ուժերին և ՀՀ այս Կառավարությունը կարող է անել այն, ինչ չի հաջողվել նախկին բոլոր կառավարություններին:

«Իհարկե, այս աշխատանքում դուք մենակ չեք լինելու, ներդաշնակորեն գործելու են մեր երկրի բոլոր օղակները, ես դա խոստանում եմ: Ձեզ ոգևորելու են, աջակցելու են, քայլելու են նույն ոգևորությամբ, բայց շարժիչ ուժը պետք է լինի Կառավարությունը, շինարարը պետք է լինի Կառավարությունը: Կրկին շնորհավորում եմ: Իմ հորդորն է նվիրվել անմնացորդ»,-ասաց Սերժ Սարգսյանը և հավելեց, որ աշխատանքային շրջանում շատ խնդիրներ կլինեն, բայց նեղանալ ու նեղսրտել չպետք է լինի։