Ո՞վ օգնեց ՕԵԿ-ին

Արդեն ավարտված ՏԻՄ ընտրությունների թերևս ամենաանսպասելի դրվագներից մեկն էլ այն էր, որ «Հայկական վերածնունդը» վեր հառնեց, աննախադեպ ցուցանիշ գրանցեց թե´ Վանաձորում, թե´ Գյումրիում: Փաստացի սա այն կուսակցությունն է, որ խառնել է բոլոր խաղաքարտերը՝ ինքն էլ հայտնվելով խառը պատմության մեջ:
Օրինակ Վանաձորում կանգնած է երկընտրանքի առջև՝ կամ միանալ «Լուսավոր Հայաստանին» ու պարտվողի կարգավիճակում թողնել ՀՀԿ-ին, կամ էլ սպասել ու տեսնել, թե ինչպես են ՀՀԿ-ն ու ՀՅԴ-ն կոալիցիա կազմում ու հաղթող ճանաչվում:

Երևի թե ականատեսը կլինենք վերջին սցենարին, որովհետև նրանք, ի պատասխան «Լուսավոր Հայաստանի» լոկալ առաջարկին, համապետական պայմաններ առաջ քաշեցին ու մերժողական պատասխան ստացան: Ստացվում է ընդդիմադիր հռչակվածները կրկին հետ են քաշվում ՝ օգնելով իշխանությանը:

Այլ հարց է Գյումրիում, որտեղ թեպետ վիճելի, բայց 17 պետքական ձայներն արդեն ունի հանրապետականը: Ամեն դեպքում՝ ԲՀԿ նախագահ Նաիրա Զոհրաբյանը հայտարարել է, որ իրենք պայմանավորվածություն ունեն «Հայկական վերածննդի» հետ, որ բանակցում են ԳԱԼԱ-ի հետ ու միգուցե փոխեն խաղի կանոնները…

Իսկ ով փոխեց ՏԻՄ-ի խաղի կանոներն ու օգնեց նախկին ՕԵԿ-ին, որը մերժված քաղաքական ուժ է համարվում, դառնալ որոշիչ ձայն…

Lurer.com-ի տեղեկություններով` Գյումրիում նրա թիկունքին է կանգնած նախկին քաղաքապետ Վարդան Ղուկասյանը, ով այդպես էլ չկարողացավ մասնակցել ընտրություններին և որոշեց թիկունքում մնալով՝ իր ներկայացուցչին մտցնել հրապարակ։ Բանն այն է, որ կուսակցության ավագանու ցուցակի 4-րդ հորիզոնականում է Ավետիս Առաքելյանը՝ Ղուկասյանի փեսան:

Սակայն Ղուկասյան- ՀՎԿ կապն այսքանով չի սահմանափակվում: Դեռ 2012 թվականին, երբ ՀՎԿ-ն ՕԵԿ էր, կար ներքին պայմանավորվածություն, որ կուսակցությունը սատարելու է ոչ թե նախկին կուսակից Բալասանյանին, ով ճակատից ՕԵԿ-ը ջնջել ու ԲՀԿ էր գրել, այլ Վարդան Ղուկասյանին…

Մտերմիկ կապեր… Այն, որ Վարդան Ղուկասյանը ունի համակիրների խումբ, դա փաստ է: Փաստ է նաև այն, որ շատերը ընտրություններից առաջ նշում էին, որ ձայն են տալու ՀՎԿ-ին՝ այդ կերպ ապահվելով Ղուկասյանի վերադարձը, քանզի նրան Գյումրիում դեռ ոմանք սատարում են:

Այստեղ հարց է առաջ գալիս՝ իսկ ո՞վ օգնեց նրանց Վանաձորում…

Անի Սահակյան