Չաշխատող հայհոյողը. Հրանտ Դավթյան

Արդյո՞ք ովքեր են… Պատգամավորներ են, ովքեր նստած ԱԺ փափուկ աթոռներին երևի թե հանուն ազգիս բարօրության կամ ի շահ իրենց օրենքներ են ընդունում, մերժում, ասում, խոսում, քննարկում ու քննարկվում…

Արդեն 4 տարի է 131 պատգամավոր ապրում է մեր վճարած հարկերի շնորհիվ ու երևի թե սրտատրոփ սպասում 2017-ին՝ մեկ էլ տեսար՝ վերընտրվեց, մեկ էլ տեսար…

Քանի որ հաշված ամիսներ են մնացել մինչ ԱԺ ընտրությունները, մենք շարունակում ենք վերհիշել նրանց գործունեությունը՝ պատգամավոր առ պատգամավոր ներկայացնելով նրանց անցած ուղին:

Lurer.com-ի դիտակետում հայտնված հաջորդ պատգամավորը ԱԺ ԲՀԿ խմբակցության պատգամավոր Հրանտ Դավթյանն է:

……………

Ծնվել է 1970թ. օգոստոսի 26-ին Էջմիածնում:

1995թ. ավարտել է Հայկական գյուղատնտեսական ակադեմիայի հիդրոմելիորացիայի ֆակուլտետը: Ճարտարագետ-հիդրոտեխնիկ:

1995-2001թթ. զբաղվել է մասնավոր գործունեությամբ:

2001թ. «Գրանտ-գրուպ» իրավաբանական անձանց միության նախագահն է:

2011թ. ԲՀԿ անդամ է:

2012թ. մայիսի 6-ին ԱԺ պատգամավոր է ընտրվել համամասնական ընտրակարգով «Բարգավաճ Հայաստան» կուսակցությունից:

……

Հակիրճ է պատգամավորի մասին տեղեկատվությունը, ճիշտ այնքան հակիրճ է նրա մասին գրվելիքը: Նախ տարիների պատգամավորական աշխատանքային գործունեության մասին՝ ասելիք չկա:

Օրինակ 2013 սեպտեմբերի մինչև դեկտեմբերը (5-րդ գումարման ԱԺ 4-րդ նստաշրջան) պատգամավորը չի տվել ոչ մի հարց, չի ունեցել ոչ մի ելույթ…

Պատկերը չի փոխվել մինչ օրս: Parliamentmonitoring.am կայքի տվյալներով մինչ օրս պատգամավորը տվել է 0 հարց, ունեցել 0 ելույթ: Փոխարենը շատ ակտիվ քվեարկել է՝ հիմնականում կողմ՝ 460 անգամ, դեմ է քվեարկել 55 անգամ, ձեռնպահ մնացել՝ 112 անգամ: Հա ու 48 անգամ էլ նիստերին չի ներկայացել…

ԱԺ-ում միշտ սուս ու փուս, կոճակ սեղմող մանդատակիր, որ փող է ստանում մեր վճարած հարկերից: Ինչո՞ւ եղբայր:

Հարց եմ տալիս ինքս ինձ, մնում անպատասխան և միանգամից ծնվում է հաջորդ հարցը՝ մի՞թե մենք նրան տեսնելու ենք նաև 2017 թվականին ձևավորվելիք խորհրդարանում…

Ներքին ձայնս է հուշում, որ Դավթյանը կձգտի ևս մեկ անգամ ձեռք բերել պատգամավորական մանդատը, չէ որ նրանով կարելի է «լավ տղա» խաղալ…

Իսկ դերի մեջ մտնել պատգամավորը սիրում է:

2015 թվականի հունիսի 19-ին համացանցում հայտնվեց մի տեսանյութ, որտեղ մեկը, մոտենալով իր մեքենան կանգնացրած ՃՈ աշխատակցին, հայհոյում էր զզվելի բառերով, լուտանքեր թափում…

«Էս եքա տռասի վրա էլ ավտո չկար հա կանգնցնելու, դեպուտատին պետքա կանգնցնես` ակտ գրես: Բեսամթ տղա ես էլի դու դառել ըտենց, արա»` սա Դավթյանի խոսքերից մի փոքրիկ հատվածն էր…

Իհարկե, նա անպատիժ չի մնացել: Կրկին մամուլում շրջանառվող լուրերի համաձայն, դեպքի հաջորդ օրը նրան իր աշխատասենյակ է հրավիրել ոստիկանապետ Վլադիմիր Գասպարյանը և դաստիարակչական ապտակ հասցրել…

Ի դեպ, երբ հավելյալ տեղեկատվություն էի փնտրում պատգամավորի մասին, նրա անունը հայտնաբերեցի ոչ բարի ցուցակում:

Պատգամավոր Հրանտ Դավթյանի անունը զետեղված է պարտադիր զինվորական ծառայությունից խուսափած պաշտոնյաների անվան ցանկում:

Անի Սահակյան