98 կողմ, 2 դեմ, 1 ձեռնպահ. «1000 դրամների» նախագիծը երկրորդ ընթերցմամբ հաստատվեց

ԱԺ-ում մեկնարկել են Կառավարության նախաձեռնությամբ հրավիրված արտահերթ նիստի աշխատանքները: Նիստի մեկնարկին քվեարկության դրվեց նախորդ օրը քննարկված զինծառայողների կյանքի և առողջության փոխհատուցման համար հիմնադրամ ստեղծելու նախագիծը, որին դեմ քվեարկեց ընդամենը երկու պատգամավոր:

Մինչ քվերկությունը, վարման կարգով խոսեց նաև ԱԺ ՀԱԿ խմբակցության պատգամավոր Հրանտ Բագրատյանը և հայտարարեց, որ դեմ է նախագծին, սակայն չի մասնակցի քվերկությանը: Նախագիծը երկրորդ ընթերցմամբ ընդունվեց 98 կողմ, 2 դեմ, և 1 ձեռնպահ ձայների հարաբերակցությամբ, 2-րդ ընթերցմամբ:

Եվ չնայած բուռն քննարկումներին՝ նախագծին կողմ քվեարկեցին նաև «արմատական ընդդիմադիր» համարվող ՀԱԿ խմբակցության պատգամավորները. քվեարկությունից հետո վարման կարգով ելույթ ունեցավ խմբակցության քարտուղար Արամ Մանուկյանն, ով խնդրեց խմբակցության կողմ քվեարկած ձայները դեմ դարձնել, քանի որ շփոթել են այլ նախագծի հետ: Նախագծին կողմ էր նաև Նիկոլ Փաշինյանը: Դեմ քվեարկող պատգամավորներից մեկը «Ժառանգություն» խմբակցության պատգամավոր Զարուհի Փոստանջյանն էր:

Հիշեցնենք, որ «Զոհված կամ հաշմանդամ դարձած զինծառայողների ընտանիքներին հատուցում տալու» օրենսդրական փաթեթով առաջարկվում է ստեղծել հիմնադրամ, որի համար քաղաքացիներից ամեն ամիս 1000-ական դրամ պետք է գանձել և ուղղել բանակին: