«Ստացվում է, որ մեր տրանզիտի համար վճարված փողից մեր զինվորի վրա կրակող փամփուշտ են գնելու». Շիրակ Թորոսյան

Վրաստանը վաճառքի է հանել նավթագազային կորպորացիայի բաժնետոմսերի 25 տոկոսը: Հիշեցնենք, որ հենց այս կորպորացիան է տնօրինում Վրաստանի տարածքով ռուսական գազը Հայաստան տարանցող հյուսիս-հարավ մայրուղային գազատարը: Նավթագազային կորպորացիայի բաժնետոմսերի 25 տոկոսի գնման համար հայտ է ներկայացրել երկու ընկերություն՝ Ադրբեջանական «Սոկար»-ը և Ռուսական՝ «Գազպրոմ»-ը: Այն, որ Նավթագազային կորպորացիայի վաճառքի հանված բաժնեմասը կարող է գնել Ադրբեջանը, անհանգստացրել է հայկական կողմին:

ԱԺ-ում լրագրողների հետ զրույցում ՀՀԿ խմբակցության պագամավոր Շիրակ Թորոսյանը ևս իր անհանգստությունը հայտնեց այս կապակցությամբ և նշեց, որ պետք է արվի ամեն ինչ, որպեսզի գնորդը չլինի Ադրբեջանը:

«Այսօր Վրաստանը որպես տարանցիկ երկիր՝ իրեն կոռեկտ է դրսևորել և գործընթացը եղել է անարգել»,- ասաց պատգամավորը՝ նշելով, որ այդ բաժնետոմսերը լավ կլինի՝ ձեռք բերի ցանկացած կազմակերպություն, միայն թե՝ ո՛չ ադրբեջանականն «Սոկար»-ը: Իսկ եթե «Սոկար», թե «Գազպրոմ», միանշանակ՝ «Գազպրոմ»»,- ասաց պատգամավորը:

Թորոսյանը շեշտեց, որ առանց այդ էլ «Սոկար» ընկերությունը Միխեիլ Սահակաշվիլու անհեռատես քաղաքականության շնորհիվ գրեթե մոնոպոլ հնարավորություն է ձեռք բերել այդ երկրում, ինչն էլ իր հերթին ինչ-ինչ խնդիրներ է առաջացնում:

«Ռուսաստանը տարածաշրջանում գազ արտանահող երկիր է, և բնական է, որ եթե «Սոկար»-ը գրավի այդ դիրքը, կստեղծվի իրավիճակ, երբ այդ ընկերությունը կփորձի դուրս մղել տարածաշրջնի ներկրողին: «Սոկար»-ը կարող է այդ հնարավորությունն օգտագործել նաև քաղաքական նպատակներով և խափանել Հայաստան գազի մատակարարումը»,- ասաց Թորոսյանը:

Նա ընդգծեց, որ եթե «Սոկար»-ն այսօր փորձ է անում ձեռք բերել ընկերության 25 տոկոս բաժնեմասը, հետագայում կարող է հավակնել ավելի շատ չափաբաժնի: «Բարոյահոգեբանակն խնդիր կա: Պատկերցրեք՝ հինգ տոկոսն է գնում, բայց մենք այդ հինգ տոկոսի համար տրանզիտի վարձ ենք վճարելու մի պետության, որի ֆինանասավորմամբ սպառազինվում է Ադրբեջանը: Այսինքն՝ ստացվում է, որ մեր տրանզիտի համար վճարված փողից մեր զինվորի վրա կրակող փամփուշտ են գնելու»,- ասաց պագամավորը:

Հարցին, թե այս իրավիճակում ի՞նչ կարող է անել հայկական կողմը, Շիրակ Թորոսյանը հավելեց, որ վրացական կողմը տեղյակ է Հայաստանի խնդրի մասին.«Հուսադրող է այն, որ երբ Վրաստանի վարչապետը հայտարարեց բաժնեմասի վաճառքի մասին, վերջում ավելացրեց, որ իրենք գիտակցում են՝ դա նուրբ հարց է և չպետք է սխալվեն»,- ասաց նա: