«Փաստ». ԲՀԿ նախագահ Նաիրա Զոհրաբյանը ռիսկի կգնա

«Փաստ» օրաթերթը գրում է.

«Ընդամենը մի քանի օր է անցել Գագիկ Ծառուկյանի հայտարարությունից և դեռևս վերջնականապես պարզ չէ, թե լայն բացված «հասարակական–քաղաքկան կոնսոլիդացիայի» դռնից մտնելով, ով կդառնա ծառուկյանական մեծ ընտանիքի անդամ, սակայն ներկա ու նախկին ԲՀԿ–ականներն իրենց հետագա քայլերը հստակեցնելու համար արդեն հասցրել են հավաքվել և շատ հարցեր քննարկել:
ԲՀԿ նախագահ Նաիրա Զոհրաբյանը «Փաստի» հետ զրույցում ասաց, որ կուսակցությունը Ծառուկյանի դաշինքով կմասնակցի ընտրություններին: Բացի այդ, նա պատրաստ է նաև իր բոլոր լիազորությունները հանձնել ԲՀԿ հիմնադիր Գագիկ Ծառուկյանին:
«Երբ մենք հանդիպեցինք Գագիկ Ծառուկյանի հետ, իմ և իմ գործընկերների կողմից կրկին բարձրացվեց այն հարցը, որ ճիշտ կլինի, որ Գագիկ Ծառուկյանը նորից ղեկավարի ԲՀԿ–ն, և ես հանձնեմ կուսակցության նախագահի և քաղաքական խորհրդի նախագահի լիազորությունները: Պարոն Ծառուկյանն ասաց, որ ինքը այդ հարցի շուրջ կխորհի և առաջիկայում մենք կունենանք նաև այդ հարցի պատասխանը: Մեկ բան հստակ է, որ համաձայն կանոնադրության, մենք մինչև մարտի 5–ը պետք է անցկացնենք համագումար, բայց կուսակցությունը ղեկավարելու մասին որոշումը բացառապես Գագիկ Ծառուկյանինը կլինի: Ինչ վերաբերում է ցանկությանը, ապա մենք ոչ միայն ցանկանում ենք, այլ կարծում ենք, որ դա արդարացի կլինի, որովհետև Գահիկ Ծառուկյանը և «Բարգավաճ Հայաստանը» անքակտելի են: Ուստի ճիշտ կլինի, որ Ծառուկյանը գլխավորի կուսակցությունը»,– ասաց Նաիրա Զոհրաբյանը:
Այս պահին դեռևս վերջնականապես չի ձևավորվել դաշինքի նախընտրական շտաբը և վերջնականապես պարզ չէ նաև, թե ով այն կղեկավարի: Առաջին նիստը վարել է Իշխան Զաքարյանը, ինչը թույլ է տալիս ենթադրել, որ հենց նա էլ կղեկավարի Ծառուկյանի դաշինքի շտաբը: ԲՀԿ նախագահը չմանրամասնեց նաև, թե նոր կուսակցություններ հիմնած իրենց նախկին թիմակիցներից ովքեր են այս պահի դրությամբ դաշինքին անդամակցելու հայտ ներկայացրել, իսկ Համախմբում–Ծառուկյանի դաշինքների հնարավոր վերահամախմբման մասին նշեց, որ «Հայաստանում գրեթե չկա որևէ քաղաքական ուժ, որը չցանկանա ներկայացված լինել Գագիկ Ծառուկյանի շուրջ համախմբվող դաշինքում, բայց ովքեր կներգրավվեն դաշինքում և ինչպիսին կլինեն բանակցությունների արդյունքները, պարզ կդառնա առաջիկա օրերի ընթացքում»:
ԲՀԿ ղեկավարը, խոսելով խորհրդարանական ընտրություններին ռեյտինգային ցուցակով ներկայացված լինել–չլինելու մասին ասաց, որ իրենց կուսակցության մոտեցումն է, որ անկախ նրանից, թե թեկնածուները համամասնական ցուցակի որ տեղում ներկայացված կլինեն, առաջադրվեն նաև ռեյտինգային ընտրակարգով:
«Իհարկե մենք հասկանում ենք, որ այստեղ լրջագույն ռիսկեր կան, քանի որ մեր այլանդակ և այլասերված ընտրական համակարգի պայմաններում քաղաքական գործչի համար դա շատ ռիսկային քայլ է: Եվ այստեղ ալյուր կամ լավաշ բաժանող ապաքաղաքական սուբյեկտին կամ թեկնածուին պարտվելու հավանականություն կա: Մենք ունենք օրինակներ, թե ինչպես Նիկոլ Փաշինյանը 10–րդ ընտրատարածքում պարտվեց Ռուբեն Սադոյանին, ինչպես քաղաքական գործիչ Րաֆֆի Հովհաննիսյանը Թալինում պարտվեց և այլն: Այսինքն' մեր քաղաքական համակարգում, որտեղ ռեյտինգը փողով է չափվում, ռիսկը շատ մեծ է, որ մեզանից յուրաքանչյուրը կարող է փող, ալյուր, ձեթ կամ մուրաբա բաժանող ապաքաղաքական կրիմինալ որևէ տարրի պարտվել: Ցավոք սրտի, սա է մեր իրականությունը, և մենք քաղաքական գործիչներով պետք է փորձենք կոտրել այդ կարծրատիպը»,– ասաց է Ն. Զոհրաբյանը:
Քաղաքական գործիչը նաև կարծում է, որ ընտրակաշառքով քվեի տեր դառնալու երևույթի դեմ պայքարելու համար ճիշտ կլինի, որ ռեյտինգային ընտրակարգով ներկայացված թեկնածուներով «Ոչ փողին» կարգախոսն ունեցող միասնական պլատֆորմ մշակեն: Դրանով ըստ Ն. Զոհրաբյանի հնարավոր կլինի կոտրել հանրության մեջ արմատավորված՝ փող վերցնելու և ընտրություն կատարելու կեղտոտ երևույթը:
«Ես հասկանում եմ ռիսկերը: Օրինակ, առաջադրվելով Մալաթիա–Սեբաստիա համայնքում, շատ մեծ է հավանականությունը, որ այնտեղ Հանրապետական կուսակցության լավաշ բաժանող թեկնածուն կարող է լուրջ թվերով հաղթանակ տոնել, սակայն դա դեռ չի նշանակելու, որ իր վարկանիշը Նաիրա Զոհրաբյանից, Լևոն Զուրաբյանից, Զարուհի Փոստանջյանից, Արմեն Մարտիրոսյանից կամ Նիկոլ Փաշինյանից բարձր է: Դա կեղծ ցուցիչ է լինելու, բայց եթե մենք ուզում ենք ինչ–որ բան կոտրել մեր իրականության մեջ, ուրեմն մենք պետք է այդ ռիսկին գնանք»,– ասաց ԲՀԿ առաջնորդը»:

Շարունակությունը' «Փաստ» օրաթերթի այսօրվա համարում: