Հաջողության գրավականը լավ թիմն է. «Մեղրամիս»-ի պրոդյուսեր

«Մեղրամիս» հեռուստասերիալն այսօր մեծ աղմուկ է բարձրացրել ու ունի մեծ դիտողականություն:

Այն, կարելի է ասել՝ միավորել է աշխարհի ծայրերում գտնվող հայերին ու ստեղծել մի մեծ ընտանիք:

Միայն ինստագրամում ավելի քան երեսուն ֆան էջ կա, յութուբը ողողված է գլխավոր հերոսների կարճ տեսանյութերով, որոնք հենց հեռուստադիտողներն են պատրաստում:

Ինտերնետային կայքերում ամենաշատ դիտումներն ունի հենց «Մեղրամիս» հեռուստասերիալը:

ԼՈւՐԵՐ.com-ի զրուցակիցն է «Մեղրամիս» հեռուստասերիալի գլխավոր պրոդյուսերը:

-Պարո՛ն Մարգարյան, ինչո՞վ է պայմանավորված սերիալի վարկանիշը ու արդյո՞ք մտածում էիք, որ հեռուստասերիալը հենց նման վարկանիշ կունենա:

-Վստահ էի: Հենց կարդացի սցենարը, հասկացա, որ սերիալը կհաջողվի, պարզապես պետք է ճիշտ դերակատարներ ընտրել:

Ընտրեցինք այնպիսի դերասանների, ովքեր տաղանդավոր են ու միևնույն ժամանակ՝ տևական ժամանակ չէին երևացել հեռուստաէկրաններն:

Հեռուստադիտողը հասցրել էր կարոտել նրանց:

-Գլխավոր դերակատարը երգիչ է, դերասան չէ: Ինչո՞ւ հենց Վաչե Ամարյանը:

-Վաչե Ամարյանը սցենարով համապատասխանում էր Արսենի կերպարին, ու բացի այդ՝ պետք էր նոր դեմք՝ այնպիսի մեկը, ում և՛ սիրում են, և՛ ճանաչում, և ամենակարևորը՝ ոչ ոք չի սպասում, որ նա հեռուստասերիալում հանդես կգա:

-Իսկ հե՞շտ համաձայնեց:

Այդ ժամանակ Վաչեն Մոսկվայում էր, ես՝ Միացյալ Նահանգներում:

Զանգահարեցի՝ խոսեցինք, պայմանավորվեցինք հանդիպել Երևանում, իսկ արդեն Երևանում մեծ ուրախությամբ համաձայնեց: Կարծում եմ՝ գոհ է:

-Դուք բավականին երկար ժամանակ եք աշխատում հեռուստատեսությունում: Պարո՛ն Մարգարյան, դուք 2006թ-ից «Արմենիա» հեռուստաընկերության գլխավոր պրոդյուսերն եք, բազմաթիվ հեռուստանախագծերի, սերիալների անմիջական պրոդյուսերը:

«Կյանքի գինը»,  «Վերադարձ», «Վտանգավոր խաղեր», «Fort boyar», «Deel or no dil».. դրանք այնքա՜ն շատ են:

 -Այո՛, դրանք շատ-շատ են: Արդեն հաշիվն էլ եմ կորցրել:

-Պարո՛ն Մարգարյան, Ձեր գրեթե բոլոր նախագծերը հաջողված են, ո՞րն է հաջողության բանալին:

-Գիտե՞ք՝ ցանկացած նախագիծ ճիշտ հաշվարկ է պահանջում:

Պիտի իմանաս՝ ինչի վրա ես շեշտը դնում ու ինչ ես ուզում ստանալ:

-Երբ զրուցում էինք Վաչե Ամարյանի ու Տաթևիկ Ադումյանի հետ, նրանք բավականին զավեշտալի դեպքեր պատմեցին՝ կապված նկարահանումներ հետ: Դուք գտնվում եք միացյալ նահանգներում. դժվար չէ՞ արդյոք հեռվից հեռու հեռուստասերիալի նկարահանումները կազմակերպելը:

-Երբ ունես լավ ու պրոֆեսիոնալ թիմ, որտեղ յուրաքանչյուրը գիտի իր պարտականությունները ու կատարում է այն բարեխղճորեն, ոչ մի խնդիր չի ծագում, իսկ եթե առաջանում էլ է՝ դրանք շատ հեշտ է հարթել:

-Կարծում եք, որ հաջողության գրավականը լավ թի՞մն է:

-Միանշանա՛կ: Թե՛ սցենարիստին՝ Անուշին, թե՛ ռեժիսորին՝ Վարշամին, ճանաչում եմ շատ վաղուց: 2006 թ.-ին մենք միասին մի շարք նախագծեր ենք իրականացրել ու հենց դա էր պատճառը, որ նախագիծը վստահվեց հենց իրենց:

-Իսկ ի՞նչ պլաններ կան առաջիկայում:

Չեմ ուզում չակերտները բացել, բայց առաջիկայի համար բազմաթիվ պլաններ ու նոր նախագծեր կան՝ թե՛ Միացյալ նահանգներում իրականացվող, թե՝ Հայաստանում: