Ինչպես «տանը չմնալ» և չամուսնալուծվել. խորհուրդներ հոգեբանից

Հոգեբան Էլոննա Ավետյանը ամուսնալուծությունների մեծ մասը պայմանավորում է նրանով, որ շատ դեպքերում ամուսինները պարզապես իրար հետ ապագայի հետ կապված որևէ ընդհանրական մոտեցումներ չեն ունենում և նրանց միջև սպառված է լինում հուզական կապը, իսկ նման պայմաններում ընտանիքը պահելը պարզապես կրում է ձևական բնույթ: 

«Հոգեբանորեն և Ֆիզիոլոգիապես ամենահարմար տարիքը 25 տարեկանից բարձր տարիքն է: Այս եզրահանգման  են եկել մասնագետները՝ ուսումնասիրելով կանանց և տղամարդկան հոգեբանական մի շարք առանձնահատկություններ»,-խորհուրդ է տալիս հոգեբանը՝ շեշտելով, որ հենց այդ տարիքից հետո են ամուսնացող զույգերը ավելի ճիշտ գիտակցում իրենց կատարած քայլի կարևորությունը: 

ԼՈւՐԵՐ.com-ը հետաքրքրվեց հոգեբանից, արդյո՞ք այսօր պահպանված է հայկական ընտանիքի ավանդական մոդելը և որքանով է առկա սոցցանցերի ազդեցությունը ամուսնալուծությունների պարագայում. «Ավանդական ընտանիքի մոդելը փոփոխության է ենթարկվել, քանի որ մեր ստացած տեղեկատվությունն ահռելի է և այսօրվա երիտասարդին հնարավոր չէ զերծ պահել դրանից: Այս առումով՝ փոփոխություն՝ անշուշտ կա, իսկ ինչ վերաբերում է սոցցանցերին, ապա պետք է ասեմ, որ ամուսնալուծությունների վրա դրանց ազդեցությունը շատ մեծ է»:

Հոգեբանն առանձնացրեց հայ հասարակությանը բնորոշ մի արատավոր երևույթ, երբ աղջկան կամ տղային անընդհատ հիշեցնում են, որ տարիքն արդեն անցել է՝ նրանց որակելով «տանը մնացած»: «Ընտանիքի անդամների կողմից նմանատիպ պահվածքը շատ հաճախ դառնում է դժբախտությունների պատճառ: Այ, հենց տանը չմնալու պիտակից զերծ մնալու համար աղջիկը կամ տղան ամուսնանում են՝ չսիրելով և ձևականորեն կրելով իրենց ուսերին ընտանիքի բեռը: Իսկ նրանք, ովքեր, չեն դիմանում, պարզապես տարիներ անց ամուսնալուծվում են»,-նշեց հոգեբանը: 

Անդրադառնալով ամուսնության կրիտիկական փուլերին և ամուսինների միջև եղած տարիքային տարբերություններին, հոգեբանը նշեց, որ ըստ կատարված ուսումնասիրությունների, ամուսնության կրիտիկական փուլերի ժամանակաշրջանում ճիշտ է, երբ զույգերն այցելում են հոգեբանների: Եղել են դեպքեր, որ այդ այցերն օգնել են պահպանել ընտանիքը, իսկ ամուսինների միջև հիմնականում 7 տարուց ավել տարիքային տարբերությունը դառնում է խնդրահարույց, երբ կինը տեսակով առավել աշխույժ և հուզառատ է: