Սամբիստ Կոլյա Կարապետյանի առողջական վիճակում դրական տեղաշարժ կա, բայց դեռևս հնարավոր չէ նրան տեղափոխել Երևան

Քանի որ Հայաստանի սամբոյի ֆեդերացիան բազմաթիվ հեռախոսազանգեր, նամակներ ու հարցումներ է ստանում մեր մարզիկիներից՝ Կոլյա Կարապետյանի առողջական վիճակի մասին, հարկ ենք համարում տարածել սույն հաղորդագրությունը և շնորհակալություն հայտնել բոլոր անհատներին ու կազմակերպություններին, ովքեր մտահոգ են Կոլյայի ճակատագրով և պատրաստ են անհրաժեշտության դեպքում օգնություն ցուցաբերել:

Հիշեցնենք, որ 2017 թ. մայիսի 18-ից 22-ը Բելառուսի մայրաքաղաք Մինսկում անցկացված Սամբոյի Եվրոպայի առաջնությունում մեր մարզիկները նվաճել էին 1 ոսկե, 2 արծաթե, 5 բրոնզե մեդալ, սակայն մեր թիմը հայրենիք էր վերադարձել ակնհայտ ընկճված, որովհետև մեր մարզիկներից՝ Կոլյա Կարապետյանը, ով մարտական սամբոյի 62 կգ քաշային կարգում նվաճել էր բրոնզե մեդալ, գոտեմարտերից հետո կտրուկ վատանալով, շտապ օգնությամբ տեղափոխվել էր հիվանդանոց և ենթարկվել վիրահատության:

Ըստ բժիշկների, մարզիկի մոտ արձանագրվել էր գլխի շրջանում արյան զեղում, ինչը ստացած հարվածների հետևանք էր: Կոլյայի կյանքը փրկելու համար հաջորդ օրը կատարվեց նաև երկրորդ վիրահատությունը, ավելի ուշ՝ երրորդը, չորրորդը: Մինսկում մոտ երկու շաբաթ մնաց նաև նրա անձնական մարզիչ Էդուարդ Ասլանյանը, շտապ ժամանեցին հայրն ու եղբայրը, ՀՀ ոստիկանության ներկայացուցիչները, քանի որ Կոլյան ոստիկանության ԿՀԴՊԳՎ 4-րդ /հատուկ/ վարչության 2-րդ բաժնի կրտսեր օպերլիազոր է, ոստիկանության ավագ սերժանտ, որոշակի ֆինանսական ծախսեր կատարեց Հայաստանի սամբոյի ֆեդերացիան, իրենց քաջալերանքը հայտնեցին Բելառուսում ՀՀ դեսպանատունն ու հայկական համայնքը, Մինսկ մեկնեց նաև ՀՀ սպորտի և երիտասարդության հարցերի նախարար Հրաչյա Ռոստոմյանը:

Ճիշտ է, Մինսկի քաղաքային շտապ օգնության հիվանդանոցի հոգատար ու արհեստավարժ բուժանձնակազմի ջանքերով Կարապետյանի առողջական վիճակում դրական տեղաշարժ կա, բայց նա երկարատև բուժման կարիք ունի և դեռևս հնարավոր չէ նրան տեղափոխել Երևան: Խնդրին տեղյակ են թե՛ Սպորտի և երիտասարդության հարցերի նախարարությունում, թե՛ Ոստիկանությունում, թե՛ Հայաստանի ազգային օլիմպիական կոմիտեում, թե՛ Առողջապահության նախարարությունում, թե՛ Աշխատանքի և սոցիալական հարցերի նախարարությունում: 

Հայաստանի սամբոյի ֆեդերացիա