Մանվել Գրիգորյանի մասին մամուլում գրվող ցանկացած տեսակի նյութ շատ վատ է անդրադառնում գործի ընթացքի վրա. փաստաբան

«Սիրո և հանդուրժողականության» հեղափոխությունից հետո Վարչապետ Փաշինյանի առաջին և կարևորագույն քայլերից մեկը կոռուպցիայի դեմ պայքարը եղավ՝ արդարությունը վերականգնելու նկրտումներով: Իրավապահ համակարգը մեկը մյուսի հետևից սկսեց բացահայտումների շքերթը, որոնց արդյունքում կալանավորվեցին ներկա ու նախկին մի շարք պաշտոնյաներ: Գեներալ, ԱԺ ՀՀԿ խմբակցոււթյան նախկին պատգամավոր Մանվել Գրիգորյանը ցուցակում առաջիններից էր, որին չխնայեց Փաշինյանը: Սակայն, ի տարբերություն ցուցակի մյուս անդամների, որոնք գրավի դիմաց ազատ արձակվեցին (այդ թվում և Արթուր Ասատրյանը՝ Դոն Պիպոն), Մանվել Գրիգորյանը դեռևս շարունակում է մնալ կալանքի տակ:

Վերջինիս փաստաբան Արսեն Մկրտչյանը ԼՈՒՐԵՐ.com-ի հետ զրույցում հետաքրքիր բացահայտում արեց: Նրա խոսքով՝ Մանվել Գրիգորյանի մասին մամուլում գրվող ցանկացած տեսակի նյութ շատ վատ է անդրադառնում իրենց գործունեության ընթացքի վրա: Մեր այն դիտարկմանը, թե Փաշինյանն անընդհատ հայտարարում է դատական համակարգի ազատության մասին, ստացվում է՝ այդես չէ՞, Մկրտչյանը չցանկացավ որևէ պատասխան տալ: 

Փաստաբանը փոխանցեց, որ իր գործընկերոջ հետ դատական համակարգի օրենսգրքի շրջանակներում բոլոր միջոցները ձեռնարկել են՝ Գրիգորյանի՝ խափանման միջոց կալանավորումը փոխելու համար. «Դիմել ենք Վերաքննիչ դատարան, գրավի միջնորդություն ենք ներկայացրել, կալանքի երկարացման համար ենք բողոքարկել, սակայն բոլորը քննարկման փուլում են, և առայժմ որևէ լուծում չկա, իսկ Մանվել Գրիգորյանի վիճակը գնալով վատանում է: Վերջին 2 օրերին շատ ավելի ծանր վիճակում է գտնվում՝ շաքարի ցուցանիշն ավելի բարձր է, իսկ  քրեակատարողական որևէ հիմնարկում չկան բավարար միջոցներ տվյալ հիվանդության բուժման համար, ինչը որ կա սովորական բուժհաստատություններում»:

Սակայն փաստաբանը նկատեց մեկ կարևոր փաստ ևս, որ Մանվել Գրիգորյանի կալանավորման այս մի քանի ամիսնների ընթացքում ընդամենը մեկ անգամ են քննիիչի թույլտվությամբ Գրիգորյանի ընտանիքի անդամներն այցելել նրան: «Մինչև օրս էլ պարոն Գրիգորյանի զանգերի և տեսակցությունների վրա արգելանք է դրված, իսկ բուժման մի շարք կուրս բաց թողնելու պատճառով առողջական վիճակը շատ է վատացել»,-հավելեց Մանվել Գրիգորյանի փաստաբան Արսեն Մկրտչյանը:

Հատուկ քննչական ծառայությունից մեզ միայն փոխանցեցին, որ Մանվել Գրիգորյանը գործը «նախաքննական ընթացքի մեջ է»:

Նշենք, որ կառավարության 825-Ն որոշմամբ, կան հիվանդություններ, որոնք  թույլ են տալիս մարդուն կալանքից ազատել, իսկ Գրիգորյանի հիվանդությունները կան տվյալ ցանկում: 

Հիշեցնենք, որ հունիսի 16-ին ՀՀ ԱԱԾ-ն ձերբակալեց ԱԺ պատգամավոր, գեներալ-լեյտենանտ Մանվել Գրիգորյանին, ապօրինի զենք-զինամթերք և զինվորների համար նախատեսված պարենամթերք պահելու մեղադրանքով։ Այնուհետև՝ հունիսի19-ին գումարված ԱԺ արտահերթ նիստում քննարկման դրվեց պատգամավոր Մանվել Գրիգորյանին անձեռնմխելիությունից զրկելու հարցն ու ընդունվեց այն: