Նոր իշխանությունների «անվտանգության բարձիկը»

Վերլուծական 24 Սեպտեմբեր, 2018 19:00

Երևանի ավագանու ընտրություններից հետո «Լույս» դաշինքի անդամները Արտակ Զեյնալյանի գլխավորությամբ այցելել են «Իմ Քայլը» դաշինքի շտաբ՝ անձամբ շնորհավորելու նորընտիր քաղաքապետ Հայկ Մարությանին՝ գրանցած հաջողության կապակցությամբ: Այս քայլը, իհարկե, կարելի է հասկանալ. ընտրապայքարում կողմերը բավական կոշտ հռետորաբանություն էին կիրառել միմյանց դեմ և «Լույս»-ի կողմից ցանկացած այլ քաղաքական ժեստ կամ հայտարարություն՝ կարող էր Զենյալյանին արդարադատության նախարարի պաշտոն արժենալ: Այսօր արդեն հայտնի դարձավ, որ «Լույս» դաշինքի քաղաքապետի թեկնածու Արտակ Զեյնալյանը կհրաժարվի Երևանի ավագանու մադատից: Այս մասին Ազատություն ռադիոկայանի ուղիղ եթերում ասաց դաշինքի անդամ, ԱԺ պատգամավոր Էդմոն Մարուքյանը: Նա նշեց, որ «Լույս» դաշինքից Երևանի ավագանիում ներկայացված կլինի երեք անձ՝ Դավիթ Խաժակյանը, Անի Սամսոնյանն ու Անի Խաչատրյանը:

Սակայն Զեյնալյանի այս քայլը, այսպես ասած ՝ հարաբերությունները կարգավորելու միակ նպատակն ու շարժառիթը չէ: Բանն այն է, որ ստեղծված քաղաքական կոնֆիգուրացիայում առկա է հստակ ֆավորիտ կամ ուժ, որին կարելի է համարել քաղաքական դաշտի լիդեր՝ դա Նիկոլ Փաշինյանի ղեկավարած քաղաքական ուժն է, միևնույն ժամանակ, դեռևս բաց է երկրորդ ուժի հարցը: Այս պահին նման կարգավիճակի հավակնում են «Լույս» դաշինքը, որի ներկայացուցիչները այսօր հայտարարել են, որ պատրաստվում են մասնակցել գալիք արտահերթ ընտրություններին: Փաշինյանի ստեղծած համակարգում «անվտանգության բարձիկի» դերակատարության ամրագրումը անչափ կարևոր է. այն դաշինքի համար ամրապնդում է երկրորդը լինելու հեռանկար՝ նրան ինտեգրելով նոր Հայաստանի ինստիտուցիոնալ, քաղաքական իրողություններին։

Տվյալ պարագայում՝ երկրորդ քաղաքական ուժի դերակատարությունը չափազանց մեծ է, որովհետև մի կողմից՝ այն իշխանությանը թույլ է տալու բաց առճակատման մեջ չմտնել հակահեղափոխության հետ, մյուս կողմից՝ հանրությունը հենց այդ ուժի մեջ է տեսնելու այլընտրանքային այն սեգմենտին, որը վաղվա պոտենցիալ իշխանությունն է։ Նման բուֆերի, կամ «անվտանգության բարձիկի» դեր ժամանակին ՀՀԿ համար կատարում էր ԲՀԿ-ն: Այսօր «Լույս»-ը ամեն ինչ անում է այդ բարձիկը Փաշինյանին վերադարձնելու համար՝ դրանով բարձրացնելով նաև սեփական կշիռը քաղաքական դաշտում: Ակնհայտ է, որ այս ուղղությամբ քննարկումներ ընթանալու են, եթե, իհարկե՝ դեռևս չեն մեկնարկել և Զեյնալյանի այցն էլ «Իմ Քայլի» շտաբ՝ հենց այս համատեքստում էր...

Ս.Խաչատրյան