Ինչ է տեղի ունենում ՀՀ-ում (թարմացվող)

23:00

Վարչապետն Ազգային ժողովի նախագահ Արա Բաբլոյանի աշխատասենյակում բանակցում է խմբակցությունների ներկայացուցիչների հետ:

22:40

Վանաձոր քաղաքի բնակիչները միացան ԱԺ-ի լուծարումը պահանջող բողոքի ակցիային: Քաղաքացիները ավտոմեքենանրով ձայնային ազդանշաններ են արձակում և քայլերթ իրականացնում:

Նշենք՝ վարչապետը հայտարարել էր, որ բոլոր մարզերի բնակիչները միանան ԱԺ հրաժարականը պահանջող ակցիաներին:

22:30

Վարչապետ Նիկոլ Փաշինյանը մտավ Ազգային ժողովի շենք՝ ստեղծված իրավիճակի վերաբերյալ ներսում գտնվող խմբակցությունների պատգամավորների հետ բանակցելու: Նրան ուղեկցում են երկրի առաջին փոխվարչապետը, փոխվարչապետները, նախարարներ: Նա ցուցարարներին խնդրեց չմտնել շենք, բայց քաղաքացիների մի մասը մտավ Ազգային ժողովի տարածք:

21:30

Խառը իրավիճակ է նաև Գյումրիում։ Մեծ թվով գյումրեցիներ են հավաքվել կենտրոնական հրապարակում, սպասում են զարգացումների:

21:06

ԱԺ արտահերթ նիստն ավարտվել է, սակայն պատգամավորները շարունակում են մնալ խորհրդարանի շենքում, քանի որ քաղաքացիները շրջափակել են Ազգային ժողովի շենքը: ԱԺ ՀՀԿ խմբակցության պատգամավոր Միհրան Պողոսյանը, հարցին՝ արդյո՞ք չի կարողանում դուրս գալ ԱԺ շենքից, հարցով պատասխանեց․ «Իսկ դուք կարողանո՞ւմ եք դուրս գալ»։

Շուշան Պետրոսյանն էլ ասաց․ «Ի՞նչ է եղել, դրսում մեր նման հայեր չե՞ն»։ Գալուստ Սահակյան էլ նշեց․ «Բոլոր մուտքերը փակել են, ինչպե՞ս դուրս գամ»։ Այստեղ շարունակում են մնալ ՀՀԿ-ի և ԲՀԿ-ի բոլոր պատգամավորները:

20:00

Ազգային ժողովը 67 կողմ ձայով ընդունեց ԱԺ կանոնակարգ օրենքում փոփոխություններ կատարելու մասին աղմկոտ նախագիծը: 

Նշենք, որ ԵԼՔ-ի պատգամավորները նիստերի դահլիճից հավաքել են պատգամավորների գրանցման քարտերը՝ փորձելով ձախողել արտահերթ նիստը, որպեսզի չընդունվի աղմկոտ նախագիծը, սակայն ՀՀԿ-ն քվեարկել է ձեռքով:

ԱԺ ՀՀԿ խմբակցության պատգամավոր Արմեն Աշոտյանը հայտնեց, որ նախագծին կողմ են քվեարկել ՀՀԿ-ն, ԲՀԿ-ն ու ՀՅԴ-ն:

19։40

Բաղրամյան պողոտան մարդաշատ է. Ազգային ժողովի դիմաց մեծ թվով քաղաքացիներ են հավաքվել:

Վարչապետ Նիկոլ Փաշինյանն ուղիղ եթերի միջոցով ժողովրդին կոչ արեց գնալ Ազգային ժողով, քանի որ որոշել են տապալել արտահերթ խորհրդարանական ընտրությունները: