Ունենք 4 ամիս ժամանակ, մինչև այս «գիշերային օրենքը» ուժի մեջ կմտնի․ Վահե Գրիգորյան

«ԱԺ կանոնակարգ» օրենքում փոփոխություններ կատարելու մասին օրենքը դեռ պետք է ստորագրի հանրապետության նախագահը, որն այդ անելու համար Սահմանադրությամբ ունի 21 օր ժամանակ: Այս ժամկետի ընթացքում Հանրապետության նախագահն ունի Սահմանադրական դատարան դիմելու լիազորություն հիշյալ օրենքի սահմանադրականության ստուգման նպատակով: Սահմանադրական դատարանն այս դիմումը կարող է քննել և որոշումը կայացնել մինչև 3 ամիս ժամկետում: Այս մասին իր ֆեյսբուքյան էջում գրել է Մարտի 1-ի զոհերի իրավահաջորդների ներկայացուցիչ, փաստաբան Վահե Գրիգորյանը:

Սահմանադրական դատարանի՝ օրենքի Սահմանադրության համապատասխանության մասին որոշումից հետո, ինչը Գրիգորյանը անհավանական է համարում, Հանրապետության նախագահն ունի ընդամենը 5 օր օրենքը ստորագրելու և հրապարակելու համար: Կարող է և ընտրել չստորագրելու տարբերակը, որի դեպքում օրենքը ստորագրվում և հրապարակվում է ԱԺ նախագահի կողմից 5 օրում:

«Մենք արդեն ունենք 4 ամիս ժամանակ, մինչև այս «գիշերային օրենքը» ուժի մեջ կմտնի ընդունողների համար լավագույն սցենարի դեպքում», – նշել է Գրիգորյանը:

Իրավաբանի կարծիքով՝ օրենքն ընդունողները չեն կարող չհասկանալ այս ամենը, հետևաբար նման արարքի նպատակը կարող է լինել սադրանքը՝ բռնությունն ու քաոսը, որ կարող է պղտորել Հայաստանյան քաղաքական դաշտի ջրերը: Սրա կապակցությամբ Գրիգորյանը պնդում է, որ պետք է ծայրահեղ զուսպ և կազմակերպված լինել: