Զինծառայող Յուրիկ Բրոյանը «սիմուլյանտ» չէ

Արդեն մի քանի օր է, ինչ վերսկսվել են քննարկումները զինծառայող Յուրի Բրոյանի սիմուլյանտ լինելու, ծառայությունից խուսափելու վերաբերյալ:

ԼՈՒՐԵՐ.com-ի հետ զրույցում փաստաբան Հայարփի Սարգսյանն ասաց, որ Յուրի Բրոյանը 15 օր կանցկացնի Կանազի հոսպիտալում, որտեղ, հիմնվելով 2 բժշկական եզրակացությունների վրա, կհաստատվի, որ վերջինս «սիմուլյանտ» չէ:

Նշենք նաև որ Մարդու իրավունքների պաշտպանի աշխատակազմին ՊՆ ռազմաբժշկական վարչությունը տեղեկացրել է, որ Յուրիկ Բրոյանին տրամադրվել է ռազմաբժշկական հանձնաժողովի կրկնակի փորձաքննություն անցնելու ուղեգիր, ինչի արդյունքում  պարզ կդառնա, թե արդյոք զինծառայող Յուրիկ Բրոյանը պիտանի է ծառայության համար, թե ոչ:

Տվյալ թեմայի վերաբերյալ ԼՈՒՐԵՐ.com-ը կապ հաստատեց իրավապաշտպան, «Լրագրողներ հանուն մարդու  իրավունքների» ՀԿ նախագահ Ժաննա Ալեքսանյանի հետ, ով մեզ հետ զրույցում ասաց, որ այսօր արդեն Յուրիկ Բրոյանին տեղափոխել են Կանազի հոսպիտալ:

«Քանի որ ՊՆ-ն շարունակում էր անհիմն ահաբեկել երիտասարդին, այդ իսկ պատճառով օրեր առաջ տեսանյութ հրապարակեցինք, որտեղ ակնհայտ երևում է Յուրիկ Բրոյանի առողջական վատ վիճակը: Դա կարևոր էր, քանի որ մեր  հրապարակած տեսանյութից հետո տվյալ խնդրին սկսեցին  արձագանքել և որին հաջորդեց Մարդու իրավունքների պաշտպան Արման Թաթոյանի, Նաիրա  Զոհրաբյանի այցը զինծառայողին: Նշեմ նաև, որ դեռ 7 ամիս առաջ, երբ Պաշտպանության նախարարությունը պաշտոնական հայտարարություն էր տարածել,  թե իբր Յուրիկ Բրոյանը «սիմուլյանտ» է, դա ևս փորձաքննության արդյունքում հերքվել է. նա «սիմուլյանտ» չէ»,- նշում է իրավապաշտպանն ու ավելացնում, որ իրենց կազմակերպությունը մինչև վերջ կանգնելու է Յուրիկ Բրոյանի կողքին և եթե ինչ-որ խնդիր առաջանա, իրենք նորից քայլեր կձեռնարկեն խնդրին վերջնական լուծում տալու համար:

Ինչպես արդեն տեղեկացրել էինք ՄԻՊ Արման Թաթոյանն այցելել է ժամկետային զինծառայող Յուրիկ Բրոյանին, ով գտնվում էր ռազմական ոստիկանության զորանոցում:

Պաշտպանն առանձնազրույց էր ունեցել զինծառայողի հետ, որի ընթացքում վերջինս պահման պայմանների հետ կապված դժգոհություն կամ բողոք չի ներկայացրել, նրա նկատմամբ վատ վերաբերմունք չի արձանագրվել:

Հիշեցնենք, որ այցից հետո Նաիրա Զոհրաբյանն իր ֆեյսբուքյան էջում տեսանյութ էր տարածել, որտեղ նշվում է, որ   այցից հետո համոզվել է, որ Յուրի Բրոյանն ի վիճակի չէ պարտադիր զինվորական ծառայության և կոչ է անում Պաշտպանության նախարարության  մարդու իրավունքների բարեվարքության կենտրոնի պետ Ալ. Ավետիսյանին ուշադրության կենտրոնում պահել տվյալ խնդրի լուծման ընթացակարգը: