«Սևերի ու սպիտակների» բաժանումը հասել է գագաթնակետին. «Հրապարակ»

«Հրապարակ» թերթը գրում է. «Երևանի քաղաքապետարանում և թաղապետարաններում «հնի ու նորի» կամ, ինչպես ասել է դասականը, «սևերի ու սպիտակների» բաժանումը հասել է գագաթնակետին:

Բանն այն է, որ համայնքային ծառայողների շրջանում ատեստավորում է սկսվել, ինչն արվում է ըստ օրենքի՝ 3 տարին մեկ: Բացի այդ՝ հին ծառայողներին, որոնց թոշակային տարիքը լրացել է (65 տարեկանը), թեև օրենքը թույլ է տալիս ևս մեկ տարով երկարացնել աշխատանքային պայմանագիրը, սակայն պայմանագրերը չեն երկարացնում:

Եվ քաղաքապետ Հայկ Մարությանի հայտնվելուց հետո մեկ տարուց պակաս ժամանակահատվածում քաղաքապետարանի աշխատակազմը մի 40 տոկոսով նորացել է՝ նոր դեմքեր են հայտնվել գրեթե բոլոր վարչություններում: Նրանք բոլորովին այլ կարգավիճակ ունեն՝ ինչպես վայել է «սպիտակ» աշխատողներին՝ սիրված ու գնահատված են, շատ բարձր պարգևավճարներ են ստանում և առհասարակ՝ յուրային են ու դրության տերը:

Իսկ հները ոչ միայն հայտնվել են «սևերի» ցուցակում, քանի որ նախկինների օրոք աշխատել են՝ կարևոր չէ, թե ինչ, այլև բոլոր առիթներն օգտագործվում են նրանցից ազատվելու համար:

Ամենակարևորը՝ եթե հին աշխատողները 80-90 տոկոսի չափով պարգևավճար են ստանում, ապա նորերից ոմանք՝ անգամ 200 տոկոսի չափով: «Պարգևավճարների ցուցակը որ նայեք, միանգամից կհասկանաք, թե ովքեր են սպիտակները, ովքեր՝ սևերը»,- ասաց մեր զրուցակիցը»:

Առավել մանրամասն՝ թերթի այսօրվա համարում: