Unison Duet-ի հերթական համերգի հասույթը կուղղվի Տավուշի գյուղերի երաժշտական կյանքի զարգացմանը

Unison Duet-ը Տավուշի լավագույն բարեկամներից է։ 2017 թվականից այս կողմ՝ ամերիկահայ երաժիշտներ Շուշաննա Հակոբյանը (Շուշաննա Հակոբյան, դաշնամուր) եւ Ռուբեն Աղիյանը (Ռուբեն Աղիյան, ջութակ, կոմպոզիցիա), ինչպես նաեւ նրանց հայ եւ օտարազգի գործընկերները, ԱՄՆ-ում եւ Երեւանում կազմակերպած համերգներով դրամահավաք են կազմակերպում եւ աջակցում Տավուշի զարգացմանը։ 2017 թվականին Unison Duet-ի կազմակերպած համերգների շնորհիվ Տավուշի մարզի Աչաջուր գյուղի երաժշտական դպրոցը ստացել է պրոֆեսիոնալ գործիքներ, գրականություն, աուդիոսարքավորումներ։

Այս աջակցության շնորհիվ, Աչաջրի երաժշտական դպրոցի սաները հաջողություններ են գրանցել հանրապետական եւ միջազգային մրցույթներում, ստացել մրցանակներ։ 2018 թվականին Unison Duet-ի կազմակերպած դրամահավաք-համերգների շնորհիվ Աչաջրի դպրոցում հիմնադրվել է ջութակի դասարան, համալրվել ջութակներով եւ մեթոդական ձեռնարկներով, որի հեղինակը Ռուբեն Աղիյանն է։

Օգոստոսի 4-ին ժամը 19։00-ին Երեւանում՝ Կոմիտասի թանգարան-ինստիտուտում տեղի կունենա հերթական համերգը, որից ստացված ողջ հասույթը կուղղվի Տավուշի Ազատամուտ եւ Լուսաձոր գյուղերի երաժշտական կյանքի զարգացմանը։

Համերգին մասնակցում է ոչ միայն Unison Duet-ը, այլեւ անվանի երգիչներ՝ Իրինա Զաքյանը, Հովհաննես Այվազյանը, Վագո Օհանյանը, Արսեն Սողոմոնյանը, Տիգրան Օհանյանը, Լևոն Առաքելյանը, Ռուզաննա Թովմասյանը եւ այլք։ Մինչ այդ, հուլիսի 30-ին, նույն նպատակով, Unison Duet-ը համերգով կներակայանա Ռուսաստանի մայրաքաղաք Մոսկվա քաղաքում։ Երկու համերգներին էլ տավուշցիների մասնակցությունը ցանկալի է։ Ձեր գնած տոմսերի գումարներով հայրենիք է կառուցվում։