Հրայր Թովմասյանի լիազորությունները դադարեցնելու գործընթաց նախաձեռնելը տեղավորվում է ԱԺ լիազորությունների իրականացման մեջ. Սուրեն Գրիգորյան

ՀՀ ազգային ժողովի «Իմ քայլը» խմբակցության պատգամավոր Սուրեն Գրիգորյանը վստահեցնում է, որ խմբակցության կողմից Սահմանադրական դատարանի անդամ Հրայր Թովմասյանի լիազորությունները դադարեցնելու գործընթաց նախաձեռնելը տեղավորվում է ԱԺ լիազորությունների իրականացման մեջ:

Գրիգորյանը նման տեսակետ հայտնեց Ազգային ժողովում ճեպազրույցում՝ անդրադառնալով լրագրողի հարցին, թե արդյոք դա իշխանության մյուս ճյուղի վրա ճնշման փորձ չէ՞:

«ԱԺ-ի կողմից նման գործընթաց սկսելն ինքնին չի կարող դիտվել որպես ճնշում, քանի որ այդ լիազորությունն ԱԺ-ին տրված է Սահմանադրությամբ: Եթե անձինք պնդում են, որ Սահմանադրությամբ Ազգային ժողովին տրվող լիազորությունն իրականացնելն ինքնին կարող է դիտարկվել որպես ճնշում դատական իշխանության վրա, իմ մեջ շատ լուրջ կասկածներ են առաջանում այդ անձանց իրավաբանական գիտելիքների վերաբերյալ»,-ասաց Գրիգորյանը:

Նա նշեց՝ երբ նախագիծը կլինի, հանրությունը հիմքերի մասին ավելի շատ մանրամասներ կիմանա:

Հիշեցնենք, որ ԱԺ «Իմ քայլը» խմբակցության պատգամավորները սեպտեմբերի 16-ի նիստից հետո հայտնել էին, որ խմբակցությունը որոշել է ՍԴ անդամ Հրայր Թովմասյանի լիազորությունները դադարեցնելու գործընթաց սկսել: ԱԺ-ն, քննելով հարցը, գաղտնի քվեարկությամբ պետք է որոշում կայացնի դիմել Սահմանադրական դատարան: Այս հարցում վերջնական որոշումը կայացնում է Սահմանադրական դատարանը: