«Իմ քայլ»-ի պատգամավորները ԼՀԿ-ի նախագծից հետո Վանեցյանի հրաժարականը համարում են զուգադիպություն

ՀՀ ազգային ժողովի «Իմ քայլը» խմբակցության պատգամավորները զուգադիպություն են համարում «Լուսավոր Հայաստան» խմբակցության՝ ԱԱԾ տնօրենի և ոստիկանապետի պաշտոնները քաղաքական դարձնելու մասին նախագծի ընդունումից հետո ԱԱԾ տնօրենի պաշտոնից Արթուր Վանեցյանի հրաժարականը: Պատգամավոր Սուրեն Գրիգորյանը նման տեսակետ հայտնեց ԱԺ ճեպազրույցում՝ պատասխանելով լրագրողների հարցերին:

«Զուգադիպություն չլինելու կասկածները հիմնավոր կարող էին համարվել, եթե մեկ հանգամանք հաշվի չառնեինք: ԼՀԿ-ի կողմից շատ վաղուց և հետևողականորեն է տարվում այն համոզմունքը, որ ԱԱԾ տնօրենի և ոստիկանապետի պաշտոնները պետք է որոշակի քաղաքական բնույթ ունենան: Կար նաև կառավարության կազմում ներգրավելու նախաձեռնություն, որը մենք մերժեցինք: Այսինքն, այս նախաձեռնությունն ու համոզմունքը ԼՀԿ-ի կողմից վաղուց են տարվում: Դրա համար ես ավելի շատ հակված եմ սա որակել զուհադիպություն, քան ինչ-որ դավադրություն»,- ասաց Սուրեն Գրիգորյանը:

Նույն խմբակցության պատգամավոր Գևորգ Պապոյանը նկատեց, որ նախքան ԱԺ հասնելը և առաջին ընթերցմամբ ընդունվելը՝ ցանկացած նախագծի համար բավականին ժամանակ է պահանջվում՝ քննարկումներ կառավարությունում, ԱԺ հանձնաժողովում: «Ես կարծում եմ, որ այս օրինագծի գործընթացը սկսել է նվազագույնը 1.5-2 ամիս առաջ: Ներքին համոզմունք ունեմ, որ այդպիսի մտադրություն գոնե այդ պաշտոնի հետ կապված չի եղել: Սա ուղղակի զուտ զուգադիպություն է»,- եզրափակեց Պապոյանը:

ՀՀ ազգային ժողովն առաջին ընթերցմամբ ընդունել է ԼՀԿ-ի կողմից ներկայացված նախագիծը: Դրանով խմբակցությունն առաջարկում է ազգային  անվտանգության և ոստիկանության ղեկավարների առջև դրվող չափանիշները նույնացնել պատգամավորների և կառավարության անդամների առջև դրվող չափանիշների հետ: