Ինչու է Ուկրաինան արգելում իր քաղաքացիներին այցելել Արցախ. Դավիթ Բաբայանը 2 պատճառ է տեսնում

Ուկրաինայի ԱԳՆ-ն հաղորդագրություն է տարածել, որով արգելում է իր երկրի քաղաքացիներին այցելել Արցախի Հանրապետություն, հակառակ դեպքում՝ նրանք կենթարկվեն վարչական կամ քրեական պատասխանատվության: Թե ինչո՞ւ է Ուկրաինայի ԱԳՆ-ն նման որոշում կայացրել, և ի՞նչ պետք է անեն Հայաստանն ու Արցախն այս առնչությամբ, ԼՈՒՐԵՐ.com-ը փորձեց պարզել Արցախի Հանրապետության նախագահի մամուլի խոսնակ Դավիթ Բաբայանից: 

«Ուկրաինան անկախ երկիր է, և ինքն է որոշում իր քաղաքականությունը: Որոշումը տարօրինակ է հատկապես, որ Արցախում Ուկրաինայի և նրա քաղաքացիների նկատմամբ որևէ խտրականություն չի եղել, որ առհասարակ որևէ մարդու նկատմամբ չի կարող խտրականություն լինել, որ այստեղ ամեն բան նորմալ է, և նրանց կյանքին, առողջությանը սպառնացող վտանգ չկա, որ Արցախը կայացած ժողովրդավարական երկիր է: Եթե լիներ քաղաքացիական կամ ռազմական պատերազմ, հասկանալի կլիներ, բայց եթե չկան նման բաներ, և Ուկրաինան նման որոշում է կայացնում, նշանակում է՝ այլ խնդիր կա»,- ասաց նա՝ ընդգծելով, որ Արցախը բաց է բոլորի, այդ թվում՝ Ուկրաինայի ժողովրդի համար:

Նրա կարծիքով՝ Ուկրաինայի այս որոշման պատճառները երկուսն են. առաջինը՝ կամ լավ չեն տիրապետում իրավիճակին, ինչի հետևանքն իշխանափոխությունից հետո ոչ պրոֆեսիոնալ մարդկանց ի հայտ գալն էր, և երկրորդը՝ ադրբեջանական խավիարի ազդեցությունը: 

Նա նշեց՝ Ուկրաինայում ապրում է մեծ թվով հայկական համայնք, այդ թվում՝ արմատներով արցախցիներ, ուստի հայ համայնքն այնտեղ անելիք ունի. «Եթե այսպիսի որոշում է կայացվում, այնտեղի մեր համայնքը, մենք՝ Հայաստանի, Արցախի հայերս, լուրջ աշխատանք պետք է տանենք, որպեսզի հասկանանք, թե ինչ է կատարվում: Ուզում են հայ համայնքի կապերը խզե՞լ Արցախի հետ, այս և այլ հարցեր պետք է պարզաբանվեն: Այն, որ սա անտրամաբանական է և չի համապատասխանում իրականությանը, միանշանակ է»,- նշեց Բաբայանը: 

Սոնա Հարությունյան