Ինչու են մարդիկ ծաղրում դատավորներին

Վերջին օրերին ամենաշատ քննարկվող թեմաներից են դատական համակարգում տիրող վիճակն ու դատավորների պաշտպանության կամ գուցե անձեռնմխելիության հարցը: Հենց այս հարցերի շուրջ էլ ԼՈՒՐԵՐ.com-ի թղթակիցը զրուցեց փաստաբան Երվանդ Վարոսյանի հետ:

«Այստեղ խնդիրը ոչ թե անձեռնմխելիությունն է, այլ՝ դատավորների  պաշտպանության խնդիրը: Ես կարծում եմ, որ նախևառաջ, պետք է գտնել արմատը: Ի՞նչն է ստիպում  հասարակության լայն զանգվածներին այսպես հեգնական տոնով դատավորների վարքագիծը քննարկել, ծաղրել նրանց: Ու սա բավական երկար  ժամանակ է»,- նշեց իրավաբանը:

Ըստ Վարոսյանի՝ պետք է հասկանալ, թե որտեղից է գալիս հասարակության նման վերաբերմունքը, որոնք են սրա պատճառները և փորձել դրանք վերացնել: Սակայն, փաստաբանը ռեպրեսիվ մեթոդներով  հարցի լուծումը խելամիտ չի համարում, քանի որ վստահ է, որ  դա ժամանակավոր լուծում է լինելու:

«Ինչ որ մեկին պատժելը կամ  դատավորին 48 հատ թիկնապահ տալը հարցի լուծում չէ:  Հասկանում ե՞ք՝  բանը հասել է նրան, որ փողոցում մոտենում են դատավորին ու մասնագիտական գործունեությանը վերաբերող հարցեր են տալիս»,- նշում է փաստաբանը:

Մեր այն դիտարկմանը՝ մարդիկ են պարզապես որոշել իրենց նման «ազատություն» թույլ տալ, փաստաբանը նկատեց. «Բայց որտեղի՞ց է դա գալիս: Դա է խնդիրը: Հասարակության շերտերը վերևից ինչ տեսնում են, այն էլ սովորում են: Այս ամենի միակ պատասխանատուն իշխանությունն է, որը, չունենալով որևէ դեղատոմս դատական համակարգը կարգի բերելու, զբաղված է դատավորներին վիրավորելով, սպառնալով, երբեմն բացահայտ, երբեմն քողարկված, երբեմն հրապարակային ելույթներով»,- նշեց Վարոսյանը:

Ըստ փաստաբանի՝ ցավալին այն է, որ այս ամենին արձագանքող  չկա, ու բնական է, որ հետևանքն էլ սա էր լինելու:

Զրույցի ընթացքում Վարոսյանը անդրադարձավ նաև այս տարվա գարնանաը դատավոր Դ. Բալայանի հետ կապված միջադեպին. «Արարքը կամ օրինական է կամ օրինական չէ, եթե Բալայանի պարագայում մենք հարցին վերաբերում ենք այնպես, որ դա ինչ որ քաղաքական ակցիա էր, իսկ ինչո՞ւ երեկվա ակցիան քաղաքական չէր: Այստեղ իշխանության կողմից խտրական մոտեցման և երկակի ստանդարտի ակնհայտ կիրառություն ենք  տեսնում»,- խոսքն ամփոփելով՝ ասաց փաստաբանը: