Առաջադրված հոդվածներից մեկով համաներում է կիրառվելու. պաշտպան

ՀՀ վերաքննիչ քրեական դատարանը՝ դատավոր Ռուբիկ Մխիթարյանի նախագահությամբ, այսօր որոշում կայացրեց մերժել  առանձնապես խոշոր չափերի վատնում կատարելու և պաշտոնեական լիազորութունները չարաշահելու մեջ մեղադրվող ՊԵԿ նախկին նախագահ Գագիկ Խաչատրյանի պաշտպանների միջնորդությունը՝ վերջինիս թողնելով կալանաքի տակ։ Այս մասին այսօր լրագրողների հետ զրույցում ասաց Խաչատրյանի պաշտպան Երեմ Սարգսյանը՝ նշելով, որ քննարկում են այս դատավորին ևս կարգապահական պատասխանատվության ենթարկելու հարցով Արդարադատության նախարարին դիմելու հարցը։ 

Նրա խոսքով՝  դատարանը չի փաստարկել  Խաչատրյանին առաջադրված առանձնապես խոշոր չափերով վատնում կատարելու մեղադրանքը. «Եթե փաստաթղթեր առկա չեն որևէ հանցագործության վերաբերյալ, ապա դատարանը այլ քայլ չունի, քան մերժել կալանավորման միջնորդությունը։ Ինչ վերաբերում է պաշտոնեական լիազորությունները չարաշահելու վերաբերյալ առաջադրված մեղադրանքին, որով գոնե նախաքննական մարմինը որոշակի փաստաթղթեր ներկայացրել է, այդ մասով եթե անգամ դատարանը հիմնավոր կասկած գտնի, ապա առերևույթ համաներման ակտ էր կիրառվելու,  իսկ Վճռաբեկ դատարանն ունի նախադեպային որոշում, որ եթե որևէ արարքի  նկատմամբ համաներում է կիրառվում,  դատարանը պարտավոր է մերժել կալանքի միջնորդությունը»,- ասաց նա։

Երեմ Սարգսյանը նշեց, որ բողոքարկել է Խաչատրյանի գույքի և դրամական միջոցների վրա դրված կալանքի որոշումը։  Տեղեկացրեց նաև, որ արգելք է դրված իր պաշտպանյալի տեսակցությունների վրա։

Հիշեցնենք, որ ՀՀ վերաքննիչ քրեական դատարանը՝ դատավոր Ռուբիկ Մխիթարյանի նախագահությամբ, այսօր որոշում կայացրեց մերժել  առանձնապես խոշոր չափերի վատնում կատարելու և պաշտոնեական լիզորութունները չարաշահելու մեջ մեղադրվող ՊԵԿ նախկին նախագահ Գագիկ Խաչատրյանի պաշտպանների միջնորդությունը և նրան կալանավորելու՝ առաջին ատյանի դատարանի որոշումը թողեց ուժի մեջ։

Գագիկ Խաչատրյանը կալանավորվել է օգոստոսի 30–ին։