Մարզպետը մնացել է իր ոճին հավատարիմ․ աշխատանքից ազատված համայնքապետի կողմնակից

Արարատի մարզի Նորաշեն գյուղում տիրող իրավիճակի մասին արդեն տեղեկացրել էինք։ Գյուղապետին առանց նախնական ծանուցման ազատել են աշխատանքից։ Գյուղի բնակիչները, արդեն նախկին գյուղապետ Նորայր Գրիգորյանի հետ միասին հավաքվել էին գյուղապետարանի մուտքի մոտ։  Համայնքում տիրող վերջին իրադարձությունների ու կայածված որոշման մասին ԼՈՒՐԵՐ․com –ի թղթակիցը զրուցեց հասարակական գործիչ, ցույցի մասնակից Բաբկեն Հարությունյանի հետ։

«Գյուղում իրավիճակը շատ լարված էր, մարդիկ հավաքվել ու արդարություն էին պահանջում։ Մեզ իրավիճակի պարզաբանում էր պետք։ Հասանք նրան, որ տեղի ունեցավ քննարկում, որին մասնակցեց նաև մարզպետը։ Մեզ ասացին, որ տեղի է ունեցել ավագանու նիստ, որի հիման վրա էլ դադարեցվել են Նորայր Գրիգորյանի լիազորությունները։ Իմ այն հարցին, թե որտեղ է տեղի ունեցել նիստը, պատասխանեցին, որ տեղի է ունեցել հանդիպում, այսինքն՝ ավագանու 5 անդամ հանդիպել են, զրուցել առկա իրավիճակի վերաբերյալ, որից հետո 4 հոգին կազմել են արձանագրություն՝ համայնքապետին անվստահություն հայտնելու։ Այդ արձանագրությունն ուղարկում են մարզպետարան։ Մարզպետն էլ շատ արագ ուղարկում է Տարածքային կառավարման նախարորություն, և որոշվում է դադարեցնել համայնքի ղեկավարի լիազորությունները»,- ասաց Հարությունյանը։

Մեր այն հարցին, թե ինչ որոշում կայացվեց՝ Հարությունյանը պատասխանեց, որ մարզպետը մնացել է իր ոճին հավատարիմ՝ ասելով, որ իրենք խախտում չեն արել ու, բնականաբար, ոչ էլ  կարողացել են  հիմնավորել  ավագանու նիստ կոչվածի իրավական մասը։

«Ասեցին, թե կազմվել է արձանագրություն։ Մենք տեսանք 4 հոգու ստորագրություն, մինչդեռ պետք է 5 հոգի լինեին։ Անում են այն, ինչ ուզում են»,- նշեց Հարությունյանը։

«Նման որոշման միակ պարզաբանումը, որ լսեցինք, այն էր, թե Գրիգորյանը ներկա չի եղել  մարզխորհրդի նիստերին։ Սա գյուղապետը չհերքեց, բայց նաև ասաց, որ իր փոխարեն տեղակալն է ներկա գտնվել, իսկ օրենքը նման խտրականություն չունի»,- նշեց նա։

Ըստ Հարությունյանի՝ համայնքապետի ժամանակավոր պաշտոնակատարը Արտակ Հարությունյանն է, ով ավագանու անդամ է։

«Ես հետագա քայլերի հետ կապված ոչինչ չեմ կարող ասել։ Միակ բանն այն է, որ ես հետևողական եմ լինելու, որ այս հարցը կարգավորվի։ Ցավոք, ոչ մի արդյունք չի եղել, հիմա ավելի վատ է, քանի որ եթե առավոտյան մտածում էինք, որ մարզպետի հետ հանդիպումը ինչ որ բան կփոխի, հիմա հաստատ գիտենք, որ ոչինչ էլ չփոխվեց»,- խոսքն ամփոփելով՝ ասաց Հարությունյանը։

Մենք կապ հաստատեցինք նաև համայնքապետարանի հետ։ Այստեղից պատասխանեցին, որ որոշման իրավական լինելու մասին կտեղեկացնեն ավելի ուշ՝ մամլո հաղորդագրությամբ։