«Վարդան Ղուկասյանի ասածը գյումրվա կատակ է, այն կապ չունի խմբակցության դիրքորոշման հետ»

ԲՀԿ խմբակցության պատգամավորներ Իվետա Տոնոյանն ու Արտյոմ Ծառուկյանը լրագրողների հարցերին պատասխանեցին ճեպազրույցի ընթացքում: Անդրադարձան երեկ ԱԺ-ում քվեարկության դրված «Օրենքով գողեր»-ի մասին օրենքին, որին, ի դեպ, ԲՀԿ-ն դեմ քվեարկեց. «Նախօրեին քվեարկության դրված քրեական ենթամշակույթին վերաբերող օրենքի նախագծին վերաբերող մեր դիրքորոշումը բազմիցս ասել ենք, ես կարող եմ ևս մեկ անգամ հաստատել: Հարցն ամենևին չի վերաբերում անձերին կամ, ինչպես ընդունված է ասել, օրենքով գողերին, ցանկացած հանցանք պետք է պատժելի լինի բնականաբար: Սրանում երկրորդ կարծիք լինել չի կարող, սակայն այս դեպքում, երբ օրենքը ծայրից ծայր խոցելի է, երբ մենք ունենք իրավական խոցելիություն, կա իրավական որոշակիության ակնառու խնդիր՝ ենթամշակույթ ձևակերպման հետ կապված, քրեական աշխարհում իրավակարգվորումների հետ կապված, աստիճանակարգության հետ կապված, չափելիության հետ կապված, մենք չենք կարող կողմ քվեարկել այս պարագայում»:

 

ԲՀԿ պատգամավորները պնդում են` օրենքը գնահատողական կատեգորիաներ է պարունակում, ձևակերպումներն էլ լղոզված են: Հենց սրանք են այն պատճառները, որոնցից ելնելով՝ ԲՀԿ-ն դեմ է քվեարկել, ոչ թե այն, որ իրենց խմբակցության որոշ պատգամավորներ կապեր ու շփում ունեն քրեական աշխարհի ներկայացուցիչների հետ:

 

Պատգամավորները հերքեցին վարչապետի այն հայտարարությունը, թե ԲՀԿ խմբակցության պատգամավոր Վարդան Ղուկասյանը ոչ անմիջական, բայց սպառնացել է օրենքի հարակից զեկուցող «Իմ քայլ»-ը խմբակցության պատգամավոր Նազելի Բաղդասարյանին: Իսկ թե արդյոք խմբակցությունը քննարկել է Ղուկասյանի այն հայտարարությունը, որ օրենքով գողերը օրինապաշտ մարդիկ են, և այս տեսակետն ինչքանով է համընկնում խմբակցության ընդհանուր տեսակետի հետ՝ պատգամավորներն ասացին. «Վարդան Ղուկասյանն արդեն ասել է, որ իր այդ արտահայտությունը գյումրվա կատակ է: Ամեն դեպքում ինչ էլ ասել է, ասել է իր անունից, ինքն ունի իրավունք ազատ արտահայտելու իր կարծիքը: Մեր խմբակցության դիրքորոշումը հարցի վերաբերյալ ասել ենք արդեն»: