ԱԺ հանձնաժողովը դրական եզրակացություն է տվել մի շարք օրինագծերի

ՀՀ ԱԺ տարածքային կառավարման, տեղական ինքնակառավարման, գյուղատնտեսության եւ բնապահպանության հարցերի մշտական հանձնաժողովը առաջին և երկրորդ ընթերցմամբ հավանություն է տվել  շարք օրենսդրական նախաձեռնությունների: Օրինագծերը քննարկվել և դրական եզրակացություն են ստացել հանձնաժողովի նոյեմբերի 27-ի նիստում:

ՀՀ ԱԺ պատգամավոր Վաղարշակ Հակոբյանի հեղինակած «Բազմաբնակարան շենքի կառավարման մասին» ՀՀ օրենքում լրացում եւ փոփոխություններ կատարելու մասին» օրենսդրական փաթեթով առաջարկվում է շինությունների սեփականատերերին սույն օրենքով սահմանված պարտադիր, ինչպես նաեւ հաստատված այլ վճարները բազմաբնակարան շենքի կառավարման մարմնին վճարել անկանխիկ եղանակով՝ իր բանկային հաշվին: Վաղարշակ Հակոբյանի խոսքով՝ օրենքների նախագծի փաթեթի ընդունմամբ կբարձրանա համատիրության անդամների պատասխանատվությունը եւ կստեղծվի հանրային միջոցների արդյունավետ բաշխման համակարգ: Ըստ հեղինակի՝ փոփոխությունները միտված են նաեւ շենքի այլ շինությունների սեփականատերերի պարտադիր նորմերի կատարմանն ուղղված վճարումների գործընթացի արդյունավետությանն եւ թափանցիկությանը:

ՀՀ կառավարությունը նախագծի վերաբերյալ ներկայացրել է մի շարք տեխնիկական բնույթի առաջարկներ, որոնք հիմնականում ընդունվել են հեղինակի կողմից:

ՀՀ ԱԺ փոխնախագահ Լենա Նազարյանի հեղինակած օրենսդրական նախաձեռնությամբ առաջարկվում է մի շարք փոփոխություններ կատարել «Տեղական ինքնակառավարման մասին» ՀՀ օրենքում: Մասնավորապես, առաջարկվում է տեղական ինքնակառավարման մարմինների որոշումների նախագծերի հրապարակումն իրականացնել հրապարակման միասնական կայքի միջոցով: Կառավարությունը որպես այդպիսին  առաջարկել է ամրագրել e-draft.am կայքը: Գործադիրն առաջարկել է նաեւ   դրույթը կիրառել 20.000 եւ ավելի բնակիչ ունեցող համայնքների համար: Հանձնաժողովականներն էլ առաջարկել են հանել 20.000 եւ ավելի բնակիչ ունեցող համայնքների սահմանափակումը: Փոփոխության ուժի մեջ մտնելու համար նախատեսվել է  2022թ.-ի հունվարի մեկը: Առաջարկն ընդունելի է եղել թե՛ կառավարության, թե՛ հեղինակի կողմից:

ՀՀ ԱԺ նախագահի տեղակալ Լենա Նազարյանի խոսքով՝ գործող օրենքում ավագանու նիստերն առցանց հեռարձակվում են միայն 10.000 եւ ավելի բնակչություն ունեցող համայնքներում: Հեղինակն առաջարկում է 10.000-ը փոխարինել՝ 3000-ով: Առաջարկություններով լրամշակված օրենքի նախագիծն ստացել է դրական եզրակացություն:

Երկրորդ ընթերցմամբ քննարկվել եւ դրական եզրակացություններ է ստացել «Ֆինանսական համահարթեցման մասին» ՀՀ օրենքում փոփոխություններ կատարելու մասին» օրինագիծը: «ՀՀ բյուջետային համակարգի մասին օրենքում փոփոխություններ կատարելու մասին» եւ կից ներկայացված օրինագծերի փաթեթի քննարկումը հետաձգվել է մինչեւ երկու ամիս ժամկետով: