«Ոչ մի հարց լուծում չստացավ»․ ավտոներկրողները գոհ չեն Մաշադյանի հետ հանդիպումից

Այսօր՝ նոյեմբերի 27-ին, ավտոմաքսատունը Գյումրի տեղափոխելու դեմ բողոքող ավտոներկրողները հանդիպել են ՊԵԿ նախագահի առաջին տեղակալ Ռաֆիկ Մաշադյանի հետ։

Նրանք նշում են,  որ ավտոմաքսատունը Գյումրի տեղափոխելը անհարմարություններ է առաջացնում, վարորդները հավելյալ գումար են ուզում Գյումրիից Երևան տեղափոխելու համար։ 

«Ավտոմեքենայի վաճառքով զբաղվելը կամ ասենք պարենային մթերքի, նույն ձեռնարկատիրական գործունեությունն է։ Ավտոմեքենաների ներմուծմումաբ զբաղվողները պետք է հաշվառվեն պետական ռեգիստրում և վճարեն օրենքով իրենց հասանելիք հարկերն այնպես, ինչպես բոլորը»,- ասաց Մաշադյանը։

Ավտոներկրողները հակադարձեցին, ասելով, որ կվճարեն, սակայն 20 տոկոսի մասին տեղյակ չեն եղել, գաղտնի է ընդունվել։

«Օրենք են մտցրել ուժի մեջ, որ 2-րդ մեքենայից  գումար պետք է բռնագանձեն, այն էլ 20 տոկոս։ Մենք այդ մասին չենք իմացել, տանը քնած ենք եղել, գաղտնի ընդունել են օրենքը, ոնց վճարենք»,- նշեցին նրանք։

Ավտոներկրողները նաև նկատեցին՝ այն տեղը, որտեղ դատարկում են կոնտեյները, չի վերահսկվում։ Եթե դատարկվում է ավտոմաքսատան տարածքում, պետք է վերահսկվի։

Մաշադյանն ի պատասխան արձագանքեց․ «Ո՞ւմ կողմից պետք է վերահսկվի։ Ձեր բնակարանն էլ ձեր համատիրության տարածքում է գտնվում։ Այս տարածքը մաքսային մարմինների կողմից չի վերահսկվում, եթե գողություն է կատարվել, պետք է դիմել իրավապահներին»։

Ավտոներկրողներն առաջարկեցին կոնտեյները դատարկել Երևանում, զննումն իրականացնել Երևանում, ինչին Մաշադյանն արձագանքեց․  «Առաջարկը ֆիքսեցի, քննարկման առարկա կդառնա»։

Ավտոներկրողների միության նախագահ Տիգրան Հովհաննիսյանը հանդիպման ավարտին տեղեկացրեց, որ ոչ մի հարց լուծում չի ստացել և Մաշադյանի հետ պայմանավորվել են կրկին հանդիպել։