Պարո′ն վարչապետ, Ձեր խղճին է Մանվել Գրիգորյանի հետագա ճակատագիրը. Լևոն Բաղդասարյան

Վարչապետը պետք է ականջալուր լինի իրավապաշտպանների բոլոր բարձրաձայնումներին, որոնք վերաբերում  են առերևույթ անօրինականություններին: Լրագրողների հետ հանդիպմանը ԱԺ նախկին պատգամավոր, ԵԿՄ նախկին նախագահ Մանվել Գրիգորյանի պաշտպան Լևոն Բաղդասարյանը կարծիք հայտնեց, որ այդպես չէ, վարչապետն ականջալուր չի լինում:

«Հակառակ պարագայում ինչո՞վ  պետք է բացատրել Մանվել Գրիգորյանի  գործով բոլոր խախտումները, որոնք իրավապաշտպանը բարձրաձայնում է, արդյունքում բացարձակ քար լռություն է»,- նշեց նա:

Բաղդասարյանի խոսքով, մեկ տարի առաջ Մանվել Գրիգորյանի հիվանդություններն այնպիսին չէին, ինչպես այսօր, այսօր արդեն պետական  լիազոր մարմինների կողմից ստեղծված միջգերատեսչական  հանձնաժողովն է բարձրաձայնում, որ հիվանդությունները ոչ միայն շատացել են, այլ  հասել են այն աստիճանի, որ տեղի է ունենում վատթարացում:

«Պաշտպանները բարձրաձայնում են, որ անձը դարձել է, ըստ էության, անդամալույծ, բացարձակ դրա գնահատականը չի տրվում դատարանի  կողմից, իսկ վարչապետն էլ ականջալուր չի լինում այն անօրինականություններին, որոնք բազմիցս բարձրաձայնվել են»,- ասաց պաշտպանը, ապա դիմելով Նիկոլ Փաշինյանին՝  ասաց. «Պարո′ն վարչապետ, նման պայմաններում, եթե Ձեր տիրույթում է որոշել՝ հիվանդ մարդը մնա կալանքի տակ, թե ոչ, ուրեմն մնալու է Ձեր խղճին Մանվել Գրիգորյանի հետագա ճակատագիրը»:

Նրա խոսքով, այնպիսի տպավորություն է  ստեղծվել, որ  ձևավորվել է մի խումբ,  որն ամեն ինչ անում է, որպեսզի Մանվել Գրիգորյանը մնա կալանքի տակ:

«Մենք մի դեպքում ունենք անձ, որի հիվանդությունները  բացասական դինամիկա են գրանցել, մարդը դանդաղ մահանում է, անդամալույծ է դարձել, դատարանը, բարձրագույն գործադիր իշխանությունը, որին ասուլիսնեիր միջոցով տեղեկացնում են վիճակի մասին, բացարձակ գործողություն չի կատարում: Դրանից հետևությունը ո՞րն է: Այն է, որ Մանվել Գրիգորյանի գործով գնում է  ընտրովի արդարադատություն»,- ասաց  Բաղդասարյանը: