27 տարին լրացած չծառայածներին քրեական հետապնդումից ազատող օրենքի ժամկետը չի երկարացվի

Հասարակություն 29 Նոյեմբեր, 2019 18:22

ՀՀ պաշտպանության նախարարությունն այս պահի դրությամբ որոշել է պարտադիր զինվորական ծառայություն չանցած քաղաքացիների մասին օրենքի գործողության ժամկետի երկարացման չգնալ: Արդյունքում 27 տարին լրացած պարտադիր զինծառայություն չանցած անձինք հնարավորություն կունենան միայն մինչև դեկտեմբերի 31-ը, վերադառնալով Հայաստան ու վճարելով օրենքով սահմանված վճարը, ազատվել քրեական հետապնդումից: Այս մասին ԱԺ-ում լրագրողների հետ զրույցում խոսեց ՀՀ պաշտպանության փոխնախարար Գաբրիել Բալայանը:

«Հիմա ես պատասխանատվությամբ հայտարարում եմ, որ այս պահի դրությամբ որոշվածը հետևյալն է՝ մենք այլևս այդ օրենքի երկարացման չենք գնալու: Հնարավորություն են ունենալու մինչև օրենքի գործողության ժամկետի ավարտը՝ դեկտեմբերի 31-ը գալ ու վճարել այդ գումարը: Քրեական պատասխանատվության են ենթարկվելու այն քաղաքացիները, որոնք չեն հասցնի գալ ու ներկայանալ»,-ասաց Բալայանը:

Լրագրողի դիտարկմանը, որ ամեն տարի օրենքը երկարացվում է, Բալայանը արձագանքեց՝ ամեն տարի տեսե ՞լ եք ՊՆ-ի դիրքորոշումը: Փոխնախարարը նշեց՝ ՊՆ-ն չի կարող անմասն մնալ այն քաղաքական դիրքորոշումից, որը որդեգրել է կառավարությունը՝ վարչապետի գլխավորությամբ: «Եթե տեսել եք այդ օրենքի նախագծի երկարացումները որևէ անգամ ՊՆ-ի կողմից չեն նախաձեռնվել: Դրանք նախաձեռնվել են մեր գործընկեր գերատեսչությունների կողից, և որոշակի քննարկումների արդյունքում կառավարությունը դրական արձագանք է տվել»,-նշեց նա։

Բալայանը նաև նշեց, որ պատգամավորների կողմից կա օրենքի գործողության ժամկետը երկարացնելու նախաձեռնություն, սակայն իրենք տվել են իրենց բացասական եզրակացությունը:

Գործող «Սահմանված կարգի խախտմամբ պարտադիր զինվորական ծառայություն չանցած քաղաքացիների մասին» ՀՀ օրենքը հնարավորություն է տալիս 27 տարին լրացած պարտադիր զինվորական ծառայություն չանցած անձանց վերադառնալ Հայաստան, սահմանված ժամկետում վճարել օրենքով սահմանված դրույքաչափերին համապատասխան վճարն ու ազատվել քրեական հետապնդումից: Սույն օրենքը գործում է մինչև 2019 թվականի դեկտեմբերի 31-ը: